【 香脆嫰滑的北京填鴨｜古琴雅苑 】 好耐無帶奶奶出街食晚飯了， 佢好鍾意食滬菜，所以我哋係尖沙咀古琴雅苑 book左枱，黎番晚「春日尋味，歡聚古琴」。 餐廳位於尖沙咀太子集團中心15樓，用餐環境光猛，樓底高很寬敞，每張枱都隔得比較開，感覺上會好安心，座位也好舒適。佢哋仲有個大玻璃窗可以見到燒鴨的過程，Aidan望到入晒神呢！ 我地3個大人加1個小朋友叫左5款主菜+1款甜品，食得勁飽，小朋友仲難得地由頭食到尾，食得好滋味添呀！   **安妮媽媽推介菜式： *北京填鴨 古琴雅苑最出名的北京填鴨當然要試吓啦， 店員會先上一小碟脆皮烤鴨，原來係在烤鴨最脆的部份切落黎的，好香脆又充滿油脂，點白砂糖食超正，奶奶就鍾意佢地的蜂蜜黃梅醬，口感清新。 北京填鴨果然名不虛傳，以傳統掛爐烤製，烤鴨片皮香脆，肉質非常嫰滑，油香滿溢，入口即化，勁滋味。師傅的刀功都好出色，每塊大小適中。 我哋最鍾意用煙韌的餅皮包住青瓜，香蔥或哈密瓜等配料一齊食，除咗可以解油膩感，仲非常惹味呢！而且北京烤鴨的配料（青瓜、哈蜜瓜、京蔥）及醬料（京醬、蜂蜜黃梅醬）可免費添加架！   *砂鍋雲吞雞 奶白色的大白菜雞湯真係好鮮甜，忍唔住飲多兩碗，菜肉雲吞皮薄餡料十足，雞肉好嫩滑多汁。   *意大利黑醋骨 呢碟的醬汁真係要讚一讚，味道酸甜令人好開胃，配白飯食真係一流！黑醋骨都整得唔錯，幾嫩滑。   *木桶包菜飯 炒飯炒得夠乾身，配埋金華火腿同菜食落好滋味。   *南翔小籠包 小籠包都係誠意推介之一，一籠有6粒，外皮夠薄，超級多汁，非常清爽鮮味。   *高力豆沙香蕉 一碟4個份量啱啱好，餡料有豆沙蓉和香蕉，香甜美味。   總括嚟講，今晚大人同小朋友都食到好滿足，享受到美食之餘，仲感受到親切的服務，下次要帶爸爸媽媽再黎食過。 ————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com