日本大阪第一嘅迴轉壽司品牌「壽司郎」上年嚟到香港開店,轉眼已經開咗7間分店!! 據知遲啲將會於大埔、中環開分店啦!! 香港人對「壽司郎」嘅熱情同喜愛程度,實在超乎想像~~ 每日一開店,輪候嘅籌已經好快派完!! 好多時,真係會由午餐時間等到晚餐先有得食... ^ 好似去咗轉日本咁呀 ^ 樂富分店 (位置前麥當勞舖) 起初我都唔明白點解朋友會咁誇張,成日都會話好想食… 山長水遠都會由新界出到嚟九龍食,而家雖然屯門有分店,不過都真係要好有毅力先食到!! 而我哋都係最近先嚟到「壽司郎」朝聖咋!! 機緣巧合見到3-4點嘅時間,walk-in輪候只係大概四十多個籌… 就去等一下吧~~平時閒閒地…等2百張台架... 樂富分店都算大間,店內都有輪候區 (有位坐)。 不過我哋當日輪候區已坐滿人,所以我哋都唯有企店外等。 等候大概30分鐘,就有台啦,仲要係卡位。 ^ 樂富分店都算大,所以餐廳細心之處係提供埋地圖~ 一入到餐廳,頓時覺得自己好似用咗「隨意門」去咗日本咁!! 內心好想去旅行嘅慾望,揀直想叫出嚟 (對唔住...真係誇張咗,但我真係好開心好興奮) ^ 卡位 ^ Bar台 ^ 冇得飛,就嚟壽司郎尋求旅行感啦~ 壽司郎係集合咗迴轉、高速線送壽司於一身嘅日本壽司店!! 如果輸送帶上面冇自己想食嘅嘢,仲可以自己Order~ 和牛B嚟到呢到都超興奮,因為好有新鮮感。 仲話以後食壽司要去呢到,好啦…希望下一次嚟都咁輕易啦 (哈) 食物款式都好多選擇,小食都好多,仲有甜品,(如: 芭菲杯) 壽司有生同埋熟,所以大人、細路都o岩食! 牛肉烏冬,由高速線送上仲要有保溫蓋蓋住,衛生之餘仲可以保溫!! 炸水牛芝士$17/3條,芝士趁熱食仲可以拉絲架!! 我哋最後埋單食咗$282,超級飽呀!! 下次要再嚟過,因為仲有好多款式未試過呀~ 餐廳入面都有BB櫈提供,日本人嘅細心,就連BB櫈都係Fit任何一個角落用。 放上卡位嘅梳化櫈上,BB櫈唔會走位,安全帶方面亦可以緊緊扣住BB~ BB就唔會輕易爬到上台,我可以有安落茶飯食啦~~ ^ 充滿喜感嘅妹妹 食物選項都多,好多款壽司都好特別。 鍾意食刺身類壽司嘅朋友,一定要嚟食呀!! 小朋友都好鍾意,不過呢到實在太受歡迎,如果帶埋小朋友的話真係要預早拎籌。 然後預行下街、玩下啦~ 肚餓先去拎籌…就太遲啦!! 如果等唔到堂食,仲有外賣。 不過外賣選擇唔多,以指定套餐為主。 而最近亦因為太多黃牛黨關係,所以「香港壽司郎」都取消咗電話app拎籌號。 要親身到餐廳領取籌號,不過用手機都可以睇到各分店大概要輪候幾多張台~ 咁大家就可以諗下,食定唔食,去邊間分店食啦。 【香港壽司郎分店】 <九龍> 佐敦彌敦道348號彌敦坊UG樓 紅磡黃埔天地享膳坊(第4期)地下G10號舖 長沙灣長沙灣道680號麗新商業中心地下G38號舖 黃大仙龍翔道110號豪苑G3樓翔盈里5號舖 樂富聯合道198號樂富廣場UG1樓L109號舖 藍田啓田道50號啓田商場2樓208號舖 <新界> 屯門屯順街1號屯門市廣場1期2樓2192-2193號舖 https://www.facebook.com/SUSHIROHONGKONG/ -------------------------------------------------- 歡迎聯絡我&和牛B: chungying56@hotmail.com MeWe專頁: https://mewe.com/p/和牛b的成長日記 Facebook專頁: 和牛B嘅成長專頁 Instagram: wagyubmami -------------------------------------------------- 姊妹合作**Precious M accessories** 利用剩餘、過期的母乳,自己動手做屬於自己的首飾,母乳媽媽給自己的小獎勵,做法簡單自己都做得到。