# Last update: 19/9/2019 轉眼間就黎到9月, 一開波係9月1日就已經去左2個講座, 多謝老公都有陪我出席, 因為有時都幾悶   第五個產前講座: 2019/9/1 美贊臣育兒護理工作坊(約1小時) 是次工作坊係美麗華酒店舉行, 場地好闊落. 本身個工作坊係1.5小時, 但佢地遲左開始又早左完, 所以全程時間都係大約1小時就完. 講真, 呢個育兒工作坊其實同早前美素佳兒搞ge大同小異, 可以話有90%相似, 主要都係有個BB公仔比您實習同佢沖涼換片咁, 如果係無咩時間/唔係想拎禮物ge媽媽可以揀其中一個去. 同之前美贊臣講座一樣, 都係有DHA藻油丸試食, 鐘意ge可以係會場用$100優惠價買一盒, (當然我都有買到). 會場亦都安排左個紅豆布丁比媽媽食.  枱面有一個似曾相識ge BB公仔比您幫佢沖涼換衫, 旁邊有一套新衫仔尿片係用黎幫BB換衫, 呢套亦係今次工作坊ge禮物. 不過大家唔好拎走枱面嗰套, 完左之後會有一套全新係reception送比大家. 但枱上ge潔手液就可以拎走. 今次要一讚係會場幫忙ge姨姨, 佢地好熱心幫忙同解答, 會主動問大家有無唔明. 完左講座酒店門外亦都有一班奶粉商姨姨邀請您加入媽媽會, 如果想拎入會禮物可以填form. 基於已經販賣左太多次個人資料, 而且嗰D入會禮物來來去去都係紗巾媽媽奶粉, 對我已經無吸引力, 所以今次我無再入會lu =P   第六個產前講座: 2019/9/1 Cheerbaby x 紫金堂產前講座 [自己坐月話咁易, 母乳餵哺知多D](約1.5小時) 去完上午場, 食個Lunch就到下午場講座. 紫金堂本身係有自己product, 亦都有陪月, 月子餐ge服務, 所以去聽都有心理準備係主力講自己D產品. 因為我自己無請陪月, 所以都想聽下如果自己坐月有咩產品可以幫忙. 佢地個講座係拉斐特舉辦, 如果當日係拉斐特食lunch, 可以有8折優惠, 出示餐廳收據仲可以換一枝紫金堂月子水. (即下圖嗰枝) 講座主要分2 part, 上半part關於一D坐月知識, 下半part就關於紫金堂產品. 一開始有一小杯紅棗水試飲, 而後半part就有湯水試飲. 呢個講座其實係無禮物, 但如果現場like佢地facebook會有一條口水肩送, (不過唔靚XD) 我自己訂左月子餐, 所以對佢地個D食療/湯包就興趣不大, 反以有興趣佢地個沖涼包, 因為聽過坊間嗰D薑皂/薑味沖涼液好似唔係好work, 用佢地D沖涼包起碼唔駛自己儲薑皮煲水沖涼.  有興趣ge媽媽可以留意住紫金堂/cheerbaby個facebook, 似乎每個月都會舉辦. 雖然係產品講座, 但一D都唔hardsell, 可以聽完就走人 =P 話咁快9月過左半個月, 而我都好勤力去聽左幾個產前講座. 第七個產前講座: 2019/9/4 Cheerbaby 幼兒疫苗講座(約2小時) 講座分2 part, 第一部份係關於幼兒疫苗, 第二部份係關於餵哺人奶. 我本身對幼兒疫苗完全無concept, 所以呢個講座對我黎講非常有用. 聽完會大約知道到底幾時BB要打針, 打邊種針, 政府包咩疫苗, 邊D針要比錢出私家打等等. 至於第二部份, 可能我已經聽過唔少餵哺人奶講座, 所以覺得唔算好印象深刻, 但整體講者內容係不錯的. 而講座禮物入面有一罐雪印媽媽奶粉, 都幾大方. 藍色B duck帽就係答問題禮物, lucky. 整體黎講呢個疫苗講座都值得去聽.   第八個產前講座: 2019/9/7 醫護聯盟 x Holle 【孕媽媽有機D有營D】烹飪及飲食工作坊(約1.5小時) 今次老公有陪我出席呢個講座, 而佢comment係麻麻, 覺得個講師講ge內容唔係幾正確, 哈哈 話明"有機", 講座主要就介紹點解&點樣揀有機食物, 後半part仲有個即場烹飪示範. 整體黎講資訊性唔算高, 我聽完最有印象就係教您認住有機logo. 現場仲有Holle設置左幾個位置售賣有機食品, 現場有D好平ge減價產品, e.g. $20一枝olive oil, 但望真D原來仲有一個星期就過期=_="所以先咁平. 雖然明白D野咁平當然有原因, 但我自己就唔Buy呢種促銷手法, 我點可能係一星期內用晒成枝olive oil!?, 最後咪又係浪費. 我買左佢即場煮嗰set茄汁麵, 最近跟佢教法煮左黎食, 老公comment係....好難食. 可能健康野唔好食都係一個定律,,哈哈. (個人口味不同, 唔代表Holle 的食品唔好食) 禮物包入面有個Tomme Tippee初生奶咀, 正好遲D比BB試下啱唔啱佢咀型.   第九個產前講座: 2019/9/11 Wondermami x Bio oil 產前講座(約1小時) 講座本身寫全程大約2小時, 但最後1小時就完左. 今次係由寶血醫院助產士講下入院分娩過程, 都幾詳細講解由作動到真係生產呢段時間會發生咩事, 爸爸要做D咩etc. 既然係crossover Bio oil, 當然會講下點樣預防&處理妊娠紋喇~ 佢份禮物包入面有一枝60ml Bio oil, 而我本身無用過Bio oil, 今次正好可以試用呢個產品work 唔work 問答環節如果答啱都會送枝60ml Bio oil, 不過今次抽唔中我, 哈哈.   第十個產前講座: 2019/9/14 Aeon x NUK母乳餵哺分享會(約半小時) 呢個分享會全程得30分鐘, 未去之前我都好好奇到底30分鐘咁短時間內容會係講咩. 原來分享會分為2部份, 第一部份係講NUK奶樽奶咀產品介紹, 第二部份就係有一位媽媽分享餵哺母乳經驗同介紹下泵奶器. 唔好以為sell product 無野聽, 呢30分鐘我都有得到新知識. 我一直都無諗過原來奶樽奶咀呢D用具係要定時更換, 而更換速度比我想像中要快, 而如果用UV機消毒, 老化速度會更快. NUK送禮物都算大方, 因為佢係一人一袋, 我同老公一齊去聽, 所以拎左2袋, 圖中禮物係2人份量. 有2個奶咀, 正, 又可以比BB試其他牌子. 而大大包嗰包濕紙巾係答中問題禮物, Lucky.   第十一個產前講座: 2019/9/15 美國雅培媽媽學堂(約1.5小時) 雅培呢個講座流程安排得好smooth, 果然大牌子奶粉商係唔同D. 講座內容分2 part, 第一部份由兒科醫生講下媽媽產前飲食, BB出世後可能會出現的情況/疾病等等, 同之前聽過的資訊都差不多. 而第二部份由註冊物理治療師介紹&示範下點同BB按摩, 有咩好處, 手勢動作係點等等. 幾新穎, 不過聽一次又點會記得, 哈哈. 係入場登時就已經送左一個透明熊仔袋比我, 入面有2張coupon分別係換媽媽奶粉&BB奶粉. 至於禮物包, 重點就係一張好得意熊仔包被, 摸落都幾舒服. P.S. 有個小tips同大家分享, 今次雅培講座我係用老公quote抽中, 而我自己係抽唔中. 有D講座淨係可以由懷孕媽媽報名, 但有D就爸爸都可以做會員報名, 大家記得善用呢個quote ;) 個半月間已經去左超過10個產前講座, 9月下半個月我會開一篇新文章繼續分享, 下次見~ 如果想重溫我係之前去過的產前講座, 可以去呢度睇下:- 2019年8月媽媽產前講座分享 https://mamibuy.com.hk/talk/article/77957 2019年9月媽媽產前講座分享 (下集) https://mamibuy.com.hk/talk/article/78872 2019年10月媽媽產前講座分享 (上集) https://mamibuy.com.hk/talk/article/79198 2019年10月媽媽產前講座分享 (下集) https://mamibuy.com.hk/talk/article/79549   遲D再update大家 多謝收看~ =)