從和牛B細細個開始，我哋就教導佢要愛護小動物、惜花惜草，愛惜身邊所有嘅嘢。   最近，知道九龍灣區開咗一間以刺蝟做主題嘅餐廳「KURI Cafe」，所以就帶住和牛B嚟呢到用餐以及參加導賞活動。       「KURI Cafe」分成餐飲區和刺蝟區。 亦即係話，如果想見到真嘅刺蝟呢，就要喺餐廳到報名參加刺蝟導賞服務。每節導賞時段，大概30-45分鐘左右。而導賞費用為$50/位，可於餐廳報名或whatsapp (9297-9821)。   餐廳方面不設訂台服務，點餐都係自行到點餐處落Order。     食物方面，有意粉、長通粉或飯類，亦有雪糕、窩夫及咖啡飲品等。     ^ 詳細餐牌   ^ 自助形式，餐具、紙巾都係自取的   我哋大概假日下午茶時間嚟到，人流唔算好多，仲有駐場魔術師表演魔術。   我哋點咗兩個意粉，芝士焗吞拿魚長通粉($48)、自家製肉醬意粉($48)，及兩杯飲品朱古力沙冰($36)、熱朱古力咖啡($33)。   食物都係即叫即做，相當有誠意呀!   ^ 自家製肉醬意粉及朱古力沙冰   ^ 芝士焗吞拿魚長通粉   ^ 熱朱古力咖啡   價錢方面，如果以主題餐廳嚟講，價錢唔算貴。 份量對我嚟講就剛剛好，不過和牛爸爸就話佢唔夠飽了~   食食下嘅時候，駐場魔術師仲同我哋玩。     魔術師同和牛B表演變魔術，氹得和牛B超開心呀!!     食完睇完魔術表演，係時候去排隊等導賞活動了。   入場前，先閱讀守則及用消毒液消毒雙手。     導賞活動前半部份，會由職員講解「刺蝟」嘅所有知識、日常清潔流程等。     同時，我哋都可以試下餵刺蝟食蟲蟲。     後半部份係自由活動，可以睇下場內嘅刺蝟。   ^ 亦可與刺蝟影相留念。   而餐廳入面嘅刺蝟大概有十幾隻，大部份都係被棄養嘅刺蝟。     活動最後一部份，仲有可以每人抽獎一次 (獎品包括刺蝟精品、現金券及雪糕券等)。     **由於刺蝟比較膽小，所以切記唔好喧嘩或用手接觸佢哋。     而KURI Cafe帶出嘅訊息，係希望大家了解刺蝟嘅特性。 先了解，再諗清楚自己能唔能夠付出時間去養佢哋。     餐廳內設有刺蝟精品出售，歡迎選購。               【KURI Cafe@九龍灣】  地址：九龍灣得寶商場地下T104A 電話：9297 9821 營業時間：12nn. - 10:30pm. https://www.facebook.com/kuricafe/   -------------------------------------------------- 歡迎聯絡我&和牛B: chungying56@hotmail.com Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。