再一次嚟到「小蜜峰農莊BeeBeeFarm」，不過今次選擇過埋夜玩足2日1夜，而且節目仲超豐富，除咗摘菜餵羊升哂級之外，今次仲會夜探螢火蟲同摘荔枝，大人細路都玩得超開心。       農莊有6間大小獨立屋，我哋今次就係住呢間坐擁無敵田園景的獨立屋，有個小陽台不特止，仲可行上一層有個天台睇風景。     獨立屋超寛敞喔！三面玻璃窗非常光猛(設有防光窗簾)，兩張梳化床跟些梳化坐椅。   而且有雪櫃、大電視及獨立浴室，大家最關心的冷氣當然都有吧！     浴室都幾企理。     按摩椅都有，真係堅！     行出屋外有個無敵大田園景色，真的很舒服很自在。     農莊很多地方都舖滿了這些防曬網，就算天氣超熱都玩得舒服。       行上天台，可以360度睇盡農莊景色。   真係一望無際，平時朝九晚五咁辛苦，可以同一家嚟到呢度真係好舒服。     在屋前面就係兔仔住的地方，可以一出門就同兔仔玩遊戲。   望向右手邊就見到彈床及羊圈。     而且仲有豬媽媽同佢D囝囡。   呀芊一入到嚟就開住冷氣嘆世界。而呀哥就...   開大...!!!     我哋Settle Down後，佢哋就先去玩彈床跳番夠本。         差唔多時間我哋就一齊集合喺教室門口，等YY叔教小朋友去收割草去餵羊。   小朋友可以親自拿鐮刀同埋竹籮去收割。   哥哥俾YY叔捉咗出去做示範。   鐮刀都比較鈍足夠用來割草又唔會有危險。     兩個都準備好哂要出發啦！     對小朋友來說，有這樣的一個小任務，落手落腳割草並親自去餵羊，俾佢哋好大的滿足感，真係好過成日打機睇電視。     哥哥快快手已經載滿一個籮。   芊芊邊割邊欣賞大自然的美。       然後我哋就行到去羊圈餵羊仔。   隔咗一段時間，呀芊仍然唔夠膽行入去直接餵羊。   哥哥就當然未驚過，我諗佢想餵獅子老虎都仲得。       芊芊都係隔住個鐵絲網慢慢咁餵。         餵到咁上下，開始諗到D懶人方法。   佢仲覺得自己好叻叻...哈哈！   屋就係附近，餵完羊豬就走番入屋嘆冷氣，同埋...   睇電視！算啦...算啦...見考完試就俾佢哋放鬆一下啦！(因為好快我哋又要開始第二個節目啦^.^)     我冇咩攪就行出去同兔仔影下相，真係超得意囉！       之後我就趕佢哋兩個出去做下運動放下電。   估唔到呀芊仲坐得落呢D BB車。       哥哥就當然揀番架靚單車玩番轉。       呀芊都係鍾意過嚟打韆鞦。     我好喜歡農莊玩的設施不多，因為可以讓小朋友更多時間自己去發掘探索，又可以讓大人跟小朋友更多空間相處。   放夠電之後又休息夠後，我哋又整裝待發去菜田摘菜，不過今次係為咗今晚個餐摘。   YY叔帶我哋去摘莧菜，仲有茄子同勝瓜，同埋俾我哋自己任摘，咁樣Buffet式摘菜，今晚一定食到飽飽。     嘩！條勝瓜咁粗咁長，食唔食得哂喔!?   兩個走咗去繼續摘，雖然係Buffet，但係我都會教佢哋食幾多揀幾多，如果唔係就浪費啦！   芊芊見到白色茄子好開心，但係鍾意摘又唔係鍾意食...(無言)   哥哥摘到好多茄子好開心。   之後兩個又抖一抖，走咗去瞓吊床幾梳乎。         搖下搖下兩個真係想瞓著咁...     但係抖咗陣之後，兩個小農夫又要開始做嘢啦。因為最近係荔枝豐收的日子，所以YY叔就帶大家去自家種的荔枝樹去摘荔枝啦！   哥哥體驗用長交剪幫大家將荔枝剪落嚟，不過大家要小心臭屁蟲跌落嚟，原來蟲射出的尿係可以整盲人對眼。     呀芊就期待住大粒大粒荔枝跌落嚟跟住執入籃。       一個剪一個裝分工合作，今晚拎入房放入雪櫃做飯後甜品，雪凍嚟食仲正。     兩個一齊數下自己摘到幾多粒，呢個畫面好純真好溫馨喔！       雖然話係今晚食，當然都要試下即摘即食，先夠好味啦！       呢度周圍環境都一樣咁靚架！一於同佢哋兩兄妹打多D咭。   之後我哋拎番先前摘的菜去洗，俾小朋友學習預備晚餐。         自己一手一腳去準備，相信今晚一定會食得特別多。   攪掂哂！可以番房等開飯。   同小朋友一齊上天台睇日落。   晚飯及床舖會有職員來幫我哋Set好，所以呢段自由時間又可以俾我同小朋友一齊輕輕鬆鬆玩啤牌。   芊(設計對白)「我晒你冷！」     再走出去露台打打咭睇睇風景講心事，哈哈！哇哂...都已晚上7:00個天仲係咁光。     有職員來替我們準備炭爐了，今晚我哋晚餐係食田園風味雞煲，仲有我哋下晝辛苦摘番嚟的蔬菜瓜類。   晚餐還真係超豐富！       而且小朋友可以親手煮自己摘的菜，成件事實在很完美。           食飽後，我哋開始晚上最後一個節目，就係去觀賞螢火蟲啦！   雖然今日天氣好好又冇雨，但係實在太大風，所以這美中不足就係遇唔到螢火蟲(途中經過都見到2-3隻)       (最後有彩蛋)   夜晚番到去食下荔枝沖個涼，大家好快就瞓著。而我就特別早起身，所以睇到咁靚的日出。   一早起身出去走走，人都零舍精神。   看見這麼多的植物及果實，真的感受大自然的美。     昨天YY叔給了幾個「水葡萄」我哋食，味道不錯！不過又唔係真係咁多「水」。   今朝早餐係皮蛋瘦肉粥同炒麵，全部都好足料呀！         食飽飽後我哋就開始第二天的活動去整砵仔糕啦！   今次仲預備咗靚靚的粉紅煲去做。   而且我哋今日做的係七彩砵仔糕。(因為上次做不到有點失望)     製作不少得的一張污糟臉相。   4款不同顏色的砵仔糕，你哋又估唔估到分別係咩味道。       一切預備好就放入煲內蒸20分鐘。   剛好呢段時間我哋就可以準備去參加小蜜蜂導賞。     YY叔帶我哋上到山，見到好多個蜜蜂箱，所有小朋友都超期待拿出蜜蜂隔。       今次有得自己拎住成個蜜蜂隔去影相，真係好緊張呀。當然緊張的係我啦...如果哥哥一唔小心跌咗落地，我哋全部人就...   回程經過超清澈的河水要洗洗臉。   最後砵仔糕都完成了，係時侯品嚐自己炮製的成果。   YY叔仲拎咗D自家製蜜糖俾大家試，真係好清甜唔涸喉。     原來農莊都養了幾隻小貓，突然來了一個弄貓環節，呢班貓奴就最開心。       最後拎砵仔糕番房慢慢嘆，再收拾行裝就完成呢2日1夜旅程，準備番屋企啦！剛好今天是父親節，這個旅程就是最好的禮物了。         話說活動過後，我深深不忿，一定要睇到螢火蟲，所以我過咗一個禮拜後，自己再次到田間搵螢火蟲。   呢晚真係俾我見到啦，仲好多呀!! 不過原來真係好難影，即使拎住相機捕光同用電話拍片，都唔係想像中咁易影，果然自然現象好理想都係用肉眼去睇 ^>^       Photo by CANON 5D Mark IV, Len | EF 16-35mm f/2.8L USM 想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2   呀劍評分: 10分   呀劍評語: 新界農場這麼多，就是找一個用心經營，不商業味道濃的實在很少數。我誠意推介小蜜蜂農莊，最欣賞的是整日活動安排，不會過份繁密緊張，可以真真正正的感受農莊大自然生活。    地址 八鄉錦上路元崗清潭路菠蘿山  營業時間 星期一至日( 年中無休) 7:00a.m.-7:00p.m.  收費 入場費 $30 自助午餐 $80 工作坊 (收費不同)  電話 9642-8569‬、6684-6677 交通可到: 巴士 64K號線，往返元朗(西)總站 / 大埔墟鐵路站 (於元崗村落) 巴士 251A號線，往返錦上路鐵路站 / 上村(循環線) (於元崗村落) 綠色小巴 72號線，往返元朗(泰衡街) / 雷公田(於清潭落) 紅色小巴 23號線，往返 元朗(裕景坊) /上村(於清潭落)  網址 http://www.beebeefarm.org   (以上資料更新至文章當日)       Facebook專頁: 呀劍萬帥 kimfamilytravel   Blog網誌 : www.kimfamilytravel.com