病病到變咗呆呆米豬 食葯之餘, 媽媽煲返d靚湯比你飲啦~~~ (呢個脫水寶寶除咗湯同奶之外咩都唔多肯飲......) 合掌瓜粟米栗子湯 材料: 合掌瓜2個 粟米1條 栗子12粒 鮮百合2個 豬"月展" 1個(細) 肉眼1小舊 無花果2粒 南北杏1湯匙 做法: 1. 合掌瓜用乾淨刷刷乾淨(唔係急口令)表皮, 連皮連核滾切成一件件 2. 粟米切件, 百合同栗子洗乾淨 3. 豬"月展" 用蒜頭薑蔥跑活水, 之後沖洗乾淨 4. 湯煲大約半煲水(我個煲可以落6.5L水, 我落咗差唔多半煲), 煲滾 5. 水滾後全部湯料倒晒入去滾10-15分鐘, 之後細火煲2個鐘飲得~ 煮食小貼士: 1. 跑活水 (即係水, 薑蔥蒜, 肉都凍水落, 中細火煲到差唔多水滾就倒返舊肉出嚟洗乾淨出面d血水油脂, 詳細理解可以睇返 鬼嫁料理手帳-跑活水比汆水飛水好? 2. 無花果對喉嚨痛, 咳都好ga~ 所以咳咳梗係要落多粒~ (平時我落一粒ga咋~) 3. 栗子養胃健脾, 唔舒服冇胃口食返d栗子就最好喇~ 米豬豬的page~ 每日都update~ 歡迎各位like&follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/