我哋嘅行程唔算緊湊，為咗令唯b有時間休息，所以我哋嘅活動主要集中喺朝早，諗返起都好眼瞓 Day 1  8am 機-> 2pm 到酒店-> 阿倍野Q’s Mall -> 心齋橋 -> 晚餐@溫野菜  當日分享： - 溫野菜適合小朋友去，幾baby/kid-friendly，有baby chair，亦有兒童餐具 - 湯底可以揀一半豆漿一半蕃茄，啱小朋友食 - 日本餐廳較少菜食，我揀溫野菜因為可以俾唯b食到好多菜（要poo poo嘛）。佢當晚食咗一大碗飯、幾個蕃茄、菜、雞肉、豬肉等，好開胃 - 餐廳有一位來自香港嘅女侍應，好好人，好主動嚟問唯b有咩想食，又介紹我哋點咩食 Day 2 (滂沱大雨) 海遊館 -> 午餐@天保山Market Place北極星 ->天保山Market Place行街-> 晚餐@心齋橋 當日分享： - 最好預早喺關西機場買海遊館飛，好似我哋去果日咁，正下大雨，我估大部分人都改行程去咗海遊館（全室內），排隊買飛條人龍好好好長 Day 3  神戶動物王國 -> 午餐@神戶動物王國-> 麵包超人館-> Birthday-> 晚餐@神戶steakland 當日分享： - 神戶動物王國唔算大亦唔算多動物，但小朋友冇乜機會近距離接觸同餵動物，所以好值得去 - 園內有烏冬啱bb食，亦有high chair - 麵包超人館唔係太多嘢玩，但小朋友見到麵包超人就會好興奮，睇劇場見到更加深刻，唯b喺當日就學識咗講Anpanman日文，之後日日喺度叫佢 - 神戶Steakland有high chair同兒童餐具 - 我有請廚師唔好加調味料喺啲菜同某一塊牛扒度（手勢加超簡單英文），同埋將一部分牛煎到全熟俾唯b食，佢都好樂意 Day 4  京都-> 堀江-> 晚餐@溫野菜 當日分享： - 我哋去崗本租和服，1-2歲嘅男裝和服選擇不多，唯b身上嘅係for 3-5歲，好彩束短啲啲就啱著 - 套衫對唯b嚟講唔太舒服，所以帶佢上清水寺度影咗一陣相好快就換返便服喇 - 和服店內冇換片嘅地方，記住帶褲仔方便喺洗手間更換，或去之前搵地方換咗先 Day 5  枚方公園-> 西松屋-> 黑門市場-> 晚餐@道頓堀 當日分享： - 枚方公園有啲遊戲睇小朋友年紀，有少部分睇高度，唯b兩歲（約95cm），喺我哋陪同下都玩到好多遊戲，包括火車、船、旋轉木馬、麵包超人幸福天空（超迷你摩天輪）、坐海豚船、飛機（一定要90cm或以上先可玩）、Adventure Safari（類似Disneyland個巴施光年射射槍咁）、4D影院、咖啡杯 - 呢度係園內差不多一半遊戲，所以2歲小朋友都好值得去 Day 6  心齋橋幸福pancake-> 梅田-> 關西機場 當日分享： - 幸福Pancake有pancake+奄列/炒蛋set，可以叫佢哋將蛋煮到全熟俾bb食 希望以上嘅分享幫到大家，期待8月嘅曼谷親子遊，到時再同大家分享！   如有興趣看更多自理寶寶的育成和BLW的分享，歡迎到我們的Facebook Page：https://www.facebook.com/weplaynlearn/