睇到呢間房嘅景色就真係值回票價！         作為女兒又係媽媽，尋日帶咗我媽媽同個女，捌底我哋屋企嘅男人，好好享受左一個只屬於女人世界嘅staycation。三婆孫提早慶祝母親節！       做咗一大輪資料搜查，最後我揀咗呢間位於黃埔嘅九龍海逸君綽酒店，價錢唔貴，環境又靚，亦都包咗$1600 dining credit ,自助早餐，自助下午茶，同埋任飲紅白酒。真正嘅由朝食到晚。   其實呢間酒店最出名嘅房類一定係有獨立泳池嘅房，但係好可惜呢類型嘅房已經滿到去七月，所以今次我揀咗海景客房，絕對都係唔錯嘅選擇！   當日我哋1:00到達已經即刻有房，因為Package包左一個叫貴賓待遇嘅服務，即係話check-in嘅時候唔需要喺樓下排隊直接上去19樓嘅貴賓閣做check-in。 多口問咗職員，我訂嘅海景客房同另一隻叫做塔樓海景客房有咩分別，原來塔樓海景客房係喺新翼既高層，但係房嘅尺寸就比一般海景客房細。 一般海景客房入面係有一面大嘅窗可以睇到完美嘅海景，喺呢度都好想多謝酒店免費幫我安排咗一間有兩面大窗既海景房可以令我哋更完美地180度睇到海景！       一入到房，果然真係冇失望，望出去好闊落又舒暢，雖然酒店有一定既年紀，但係經翻身之後，房間內都10分新淨舒適！     放低咗啲嘢之後我哋去咗黃埔嗰邊行下。雖然老實講酒店真係冇咩兒童嘅設施，但係附近都有好多啱小朋友玩嘅地方，就例如最大嘅黃埔冒險樂園都好近㗎。 大約三點到我哋就返咗去酒店食下午茶自助餐，老實講呢個係package包嘅都冇乜帶有好大期望，會有少量嘅甜點同點心同埋飲品。   之後呀囡開始眼瞓，咁佢同婆婆就喺房度瞓覺，我就打算一個人上去泳池飲杯嘢。 原來因為疫情之下酒店嘅泳池吧係暫停開放既，而酒店嘅泳池都有熱情疫情下嘅措施，每日只開放九節，每一節只限24人，住客係需要喺每節半小時前以先到先得嘅形式拎飛入泳池。   天色唔係咁好所以我都係逗留左唔夠2分鐘就走咗喇～   五點至七點半，喺貴賓閣嗰度有一個任飲紅白酒嘅下午茶，都係有少量嘅食物提供。由於訂咗晚上食自助餐，所以我都係參觀下就算。     到咗晚上6:30我哋就開始去酒店大堂嘅 The Promenade食自助晚餐，一直呢間餐廳嘅自助晚餐都幾獲好評，果然真係冇失望，即開生蠔，厚切鵝肝多士，燒龍蝦，炆鮑魚鵝掌，粉絲蒸鮑魚，仲有多款種類嘅刺身，同埋美味極又多款甜品，雪糕！ 當中我同媽媽非常非常欣賞酒店嘅芒果拿破崙，如果有機會嘅你哋一定要試吓！真係好好味       食飽咗之後可以喺酒店海旁散下步消化下。然後返咗房浸埋個浴就休息了～ 。   第二朝瞓到自然醒，打開窗簾，又一個舒適嘅環境映入眼簾，慢慢落去食個自助早餐，之後執埋啲嘢我哋就走了～ $1600 Dining Credit真係好夠用,剩咗嗰少少錢我哋就用埋佢喺酒店嘅Cafe買咗幾件蛋糕返屋企食～   總括嚟講今次staycation嘅體驗都係正面既 但係可能因為佢唔係親子酒店，所以佢真係冇小朋友嘅玩樂設施。 但係如果嚟休息吓Hea下食下，都真係唔錯嘅選擇。   今次提早咗慶祝母親節，我係經K-look 訂既package。不過原來酒店自己都有一個係叫做「母親節住宿計劃」package ,做到5月9號： https://www.facebook.com/271076181143/posts/10158830546796144/?vh=e&d=n   我買既K-look package: https://www.klook.com/zh-HK/activity/46228-1-night-stay-harbour-grand-kowloon/         最後都係果句，疫情絕不能輕視，就算出去玩樂嘅話都好好保護自己呀～????   ～希望你哋會鍾意我嘅分享～❤️❤️       分享和交流我的育兒點滴，好玩好食和食譜參考： 立即去我地既fb page俾個like https://www.facebook.com/三頭六臂YoMaMa我的育兒手記-104950357899223/