安立仔而家已經10KG⋯如果唔用孭帶，我真係抱到手都斷⋯但，點解會有6條孭帶咁多！！關於呢點，真係唔覺意⋯其中有兩條係二手，一條係婆婆送嘅，不過⋯自己買都買咗三條⋯不過用起上嚟先知邊款啱用！同大家分享吓～   1. 孭巾 baby sling 呢款係阿妹強烈推薦，佢由陀B時用嚟做托腹帶，之後一直用到而家阿囡十個月大，依然好好用。但係我就用得好少，因為媽媽手痛綁唔到，同埋安立細個一喊就要托上膊頭瞓，唔係好啱我用，用咗幾次就冇用。另外見有款係一套上去就用得好似方便好多，但就只限初生唔可以用到大。 ⭕️優點： 全包裹式適合中意安感BB，綁咗上身活動自如，放狗同去廁所都得。???? ❌缺點： 每次要綁要拆，唔太方便，要不斷練習。 ⚠️注意事項： 初生用可以將頭用布包埋入去/捲毛巾喺頸位置托住，但需要注意BB呼吸係咪暢順，外國發生過令BB窒息嘅意外。 另外要注意BB腳仔要呈M字，放埋入布入面包住或放出嚟都要M字彎曲好似踎喺度咁，上圖我孭到咁係錯誤示範。????   2. 十字孭帶 呢條係二手人哋俾，非常方便，但係要BB頸仔硬晒先用得。 ⭕️優點： 就咁套上身放佢落去就搞掂，膊頭兩邊平均受力，係六條孭帶中孭得我最舒服。 ❌缺點： 對BB後背後頸承托不足，盆骨承托不足，好難呈M字腳。 ⚠️注意事項： 因為條孭帶只係包到去BB格甩底位置，所以就算BB頸仔硬咗都要用手傍住後頸以免BB向後chok時整親，另外避免用太長時間/太多會對盆骨發育唔好。 3. 單肩坐式孭帶 呢款最近大熱嘅孭帶，拎出街用詢問度很高，我自己使用率都好高，因為實在好方便。 ⭕️優點： 容易使用、輕便，尤其氹瞓覺時可以單手除扣唔會整醒BB，出街配BB車用都好好唔駛拎咁多嘢。 ❌缺點： 因為輕便只係俾你缷吓力，向後chok就會跌，撐直腳會sir咗落去，要長期扶實BB。仲有因為單肩式所以單邊膊頭會痛，用佢官方個孭法更痛！ ⚠️注意事項： 識坐先好用，所以官方話要一歲先用得，安立硬淨所以半歲就用。 用嘅時候都要注意腳仔要M字咁坐，同埋因為盆骨會受壓逼，最好都唔好用太耐。（上圖中間係錯誤示範⋯）   4. 印尼孭帶 呢款朋友強烈推薦，婆婆話傳統上婆婆要送孭帶俾外孫，我又冇呢類型孭帶，所以買咗。初生時用得唔算多，因為安立唔中意被包住，但而家使用率同上面單肩坐式孭帶不相伯仲，係氹瞓覺神器，安立一眼瞓就放佢落去包埋對手唔俾佢郁，好快瞓著，有時包埋佢去廚房煮嘢唔駛俾佢阻住我，仲可以用嚟埋身餵奶解放雙手！ ⭕️優點： 全包裹式有安全感，有厚墊承托頸部，算係輕便同埋容易配戴，有多種孭法向前又得，對住阿媽又得，打橫又得打直又得，初生用又得大個用又得。 ❌缺點： 初初用要試一輪至知點用。 金屬扣拆嗰時會有聲，要小心唔好整醒BB。 如果大啲用時腳仔放出嚟BB撐直會sir出嚟。 ⚠️注意事項： 同樣要注意初生呼吸問題，同埋BB腳仔要呈M字腳。   5.孭帶連hip seat 呢樣好似係必備用品，而我買呢款係輕便透氣型，仲有個伸縮掣較條孭帶長度，爸爸媽媽交換孭時唔駛整條帶咁辛苦。 ⭕️優點： 長時間孭對BB盆骨承托最好，向前向後孭都得，拆孭帶淨係用hip seat又得。 ❌缺點： 好大舊又唔知點摺，又好難洗。 ⚠️注意事項： 原來唔同hip seat孭帶cutting唔同，配咬咬巾都有唔同，買咗啲咬咬巾琴唔晒條孭帶，成日咬到⋯要買全覆蓋型嗰款咬咬巾。   6. 直立式孭帶 呢款話初生可以用嘅直立式孭帶係人哋俾，但由於已經有其他好方便嘅孭帶，所以面對佢咁複雜嘅結構，拎咗幾次出嚟都放棄咗冇用⋯ ⭕️優點： 見朋友用可以覆蓋埋頭仔好似對BB保護性幾好。 ❌缺點： 我係完全唔知點孭上身就放棄咗嘗試⋯ ⚠️注意事項： 直立式要注意初生BB條頸仔嘅姿勢，同埋有冇揞住口鼻阻礙呼吸。   鹹魚白菜各有所好，各位媽媽要揀啱自己就手嘅孭帶，對自己好啲～提防媽媽手～   歡迎瀏覽FB專頁～3隻黐媽b：黑唐啤娜＆白柴迪迪＆安立寶寶