尋晚，有位弟兄為我禱告，佢話喺禱告入面感受到，我由一生咗牛油紙之後就一直開行咗個turbo，從未有停頓下來……   的而且確，我真係一刻都停唔到落嚟…… 我反問自己，當媽的，唔係應該就係咁嗎？   因為做人阿媽，我放底咗學沖咖啡嘅興趣。因為咖啡因會增加患有過度活躍症嘅機會，如果唔飲，沖嚟又有D咩意思？所以部咖啡機已經放咗喺廳度鋪塵； 我以前好鍾意聽詩歌嚟平靜自己嘅心身靈，而家只會開住D兒歌畀牛油紙聽； 我以前好鍾意自己一個去跑步，同自己相處一下，而家我剩係想攬住牛油紙，咩嘢運動都唔想做。   係時候要停落嚟，重新分配一下自己嘅時間，讓部咖啡機「重出江湖」。當媽的，並不是代表要放棄自己嘅興趣，犧牲所有嘅時間。要記住，媽媽唔開心，都唔會湊出一個快樂的寶寶，給自己一個coffee break嘅時間，同自己獨處一下，欣賞一下大自然嘅景色、聆聽一下自己內心嘅需要。