上次介紹左我自己既準備之後,今次就到戲肉啦, 我只可以講到而家呢刻我都依然覺得照顧初生bb係一件非常地獄既事!! 回望真係唔知自己同老公都點樣過呢一個月,今日就等我地一齊回憶下啦~     初生bb每3個鐘就要飲一次奶, 初初我記得係飲60ml, 之後好快就已經升到90ml,無幾多日就升到120ml喇, 不過個個bb都唔一樣既, 我家芝芝到而家都係一個大食bb, 由出世既3.35kgs到而家9.5月已經差唔多12kgs喇, 由中碼bb升到上加大碼bb,而媽媽我係從來都唔會迫佢食野,遲d再同大家講下芝芝加固之路! 首先, 我同老公一早已經決定好要2個人坐月,所以老公一早將大假例假咩假乜假全部group埋一齊, 一次過放一個月, 頭2日,芝芝都好乖嫁, 食完就訓,訓完就食,什至有時唔起身食添,不過朋友就提醒初生bb係唔可以由佢訓嫁, 要盡量俾佢食,等佢poo同vv都去多啲, 咁就唔怕會黃,(即係新手媽媽都會好擔心既黃疸),所以我係好努力準時叫佢食奶, 不過好快乖既日子就過去, 芝芝開始食日喊, 唔可以放低,一定要抱住, 你以為佢訓左咩,一放低,佢又即刻醒, 你又要抱返起佢,再氹過佢訓, 加上芝芝回奶問題好嚴重,所以每日我都係換衫換片餵奶氹訓無限loop   好快我同老公就搵到一個時間表, 就係我日更,老公夜更,由朝早9點到晚上10點左右都係我負責既, 到左10點我就要安心去好好訓下,雖然講真,芝芝一喊我都一定會紮醒,不過真係要相信老公,佢搞得掂既, 其實日子日日都係咁過,好快已經過完一個月,真係要打大佬既日子係老公返左工, 我要1打1既時候..... 不過有2個問題特別想同大家分享下, 腸絞痛 芝芝既腸絞痛其實都幾嚴重下, 點樣可以知係腸絞痛? 芝芝係每晚定時定候就喊唔停,無論佢做緊咩,佢都係喊, 就算係飲緊奶又好,我已經抱實佢又好, 佢都係喊, 無論點樣,佢都係唔收聲,喊到勁可憐, 真係會好無助,我已經試過N咁多次抱住佢一齊喊,網上亦都流傳好多唔同既方法,按肚,搵蛋揉肚,各式各樣我都試過, 芝芝都仲係每晚同一時間就喊唔停,我連奶樽都換埋,佢都依照係咁,到最後唯有試下肥仔水,一試芝芝竟然無晒事...... (腸絞痛大大下4-6個月就會消失,支肥仔水返黎芝芝只係食過2次)   夜奶 芝芝係個半月時就自己戒左夜奶,唔起身飲奶, 頭一個月因為擔心黃疸問題係會準時叫醒佢食奶,  直到滿月返健康院黃疸指數退晒, 我先開始唔再叫芝芝飲奶,由佢自然起身喊就飲, 唔起身就由佢訓 到個半月佢已經完全唔起身飲,可以由12點訓到7點喇.... (媽媽唔需要擔心bb會唔會餓親唔夠營養,bb係自己會揀嫁,而且訓教都可以幫忙長肉,放心啦)     後記: 芝芝只係飲過半個月既人奶就已經係全奶粉喇, 一黎芝芝係大食BB,我奶量根本追唔上, 2黎,2個新手父母照顧一個初生BB真係唔容易,我經歷過塞奶,自己按胸,真係好攰好辛苦, 老公見我成日喊,好擔心我,所以都勸我放棄,加上芝芝天生唔中意埋身....最後我都放棄左... 一直到而家都係全奶粉BB, 全奶粉BB都可以肥肥白白好健康嫁!媽媽們唔好俾咁大壓力自己呀~     歡迎聯絡合作和活動,邀稿: Email: risako_ka@yahoo.com.hk Instagram: Tszyuchichi