好喇, 到生產記錄喇, 我預產期係6月9號,上篇都有提到我直到生之前都一直係仁愛既健康院到覆診, 咁由37weeks果次覆診開始,佢就俾定一個裝好左我既覆診紀錄既公文袋俾我, 等如果萬一我真係要生既時候都可以帶埋個公交袋去醫院俾醫生睇到紀錄, (無錯, 健康院同醫院既電腦系統係唔通嫁, 所以只可以靠呢個公文袋先有紀錄!) 我都黑人問號!! 一直到左39weeks我都係無任何可以生既徵兆,所以健康院就幫我約左係41weeks1day果時返醫院催生 所謂既約就係有一張紙條寫左日期再釘係個公文袋上面(點解我會講所謂?睇落去你就會明.......) 約好左催生期之後要做既就係等....等到有徵兆想生就可以去醫院, 如果無呢,就按催生期自己去醫院就OK, 不過我真係好心急, 因為個肚真係好大好重,而且我仲要有蕁麻疹,完全勁痕, 已經再無心機去理個肚有無紋, 一心只係想唔好再痕,樣樣野我都試過,最後用熱痱水先叫做舒服小小,我個肚真係花到我放棄人生......... 到左40weeks1day,我都仲係未有任何徵兆,但因為我覺得自己個心跳好快好急, 什至個心有想跳出黎既感覺, 所以就直接帶埋走佬袋去醫院喇, 去到醫院做完一大輪例行檢查, 醫生就話我一切正常無問題, 如果擔心既就留一晚觀察下, 但其實我自己都幾肯定心跳快呢個問題係因為懷孕後期而做成, 所以我就好直接咁問醫生可唔可以早幾日幫我催生, 結果,當然係唔可以啦, 公立醫院係規定一切正常既話一定要夠41weeks先可以催生... 咁過左一晚之後我就懷住失望既心情返屋企喇.....臨走之前,再double confirm個催生期, 點知一check之下竟然話無我既紀錄,明明佢就係對住健康院俾我既催生字條黎check, 仲要同我講我本黎果日(即係41w1d)full左,無位幫我催生, 最快有位要去到41w3d!!! 係我咁想生芝芝出黎既果一刻,我真係好嬲好唔開心, 不過無辦法啦..仲可以點, 我又懷住更更失望既心情返屋企..... (所以我真係好唔明....點解醫院同健康院可以咁無溝通............) 終於千辛萬苦等到41w3d, 一早起身老公就同我一齊食早餐,一齊去醫院登記, 做好檢查之後就要上房等醫生黎幫我塞藥正式催生,好記得到醫師黎塞藥果時已經係朝早11點, 好快手就已經塞完, 你問我有咩感覺,其實只係俾人用手指了一了下面既感覺, 到左1點左右,姑娘黎檢查過話可以吊藥喇, 一上左藥之後就開始痛到, 不過我都覺得係可以接受範圍之內既, 一直到左4點左右醫生再黎幫我人手穿水,陣痛就黎料啦,我仲記得痛既期間老公黎過一次,佢係咁同我講野, 但我係完全聽唔到有聲, 只係得個畫面見到佢同我講野, 到左5點幾, 姑娘仲要黎同我講話我已經開到3度,但產房未有位,仲未可以落去.....未落去既意思即係我無笑氣可以聞...... 亦即係我打無痛無望....(明明人地一開始生都講想要打無痛嫁啦....T^T) 最後姑娘見我咁痛苦就幫我係patpat打左支止痛針,不過對我黎講...無咩用囉... 等到接近7點左右, 終於有位可以落產房喇!!要等到唔痛既時間轉床落去, 我都已經唔係太記得自己係點樣落去, 落到去無耐就見到我老公已經係到等緊我,終於可以見到我老公喇,個心當堂定啲,亦終於可以聞到一直聽左好耐既笑氣, 助產侍黎到話我可以試生喇,佢總係叫我用力,同我講見到頭仔喇見到頭仔喇,講左好多次, 我真係好懷疑佢係呃我既, 所以我用左最後既氣叫我老公行去睇下係咪真係見到芝芝既頭仔, 點知佢怕血,唔肯去睇, 最後我係7點35分就生左芝芝出黎啦,一出左黎姑娘俾我望左一眼就拎左去沖乾淨, 而我就要繼續努力柯埋個胎盤出黎,但個心一早已經飛左去芝芝身上啦, 可惜胎盤柯唔出黎,我仲要血崩,我係好明顯feel到有一股暖流流出黎, 姑娘一用手撳住就停左, 一放手又繼續流, 只係記得佢話如果再柯唔出就要去緊急開刀拎返出黎,一聽到開刀我就好驚啦,由一有左到生既心願都係可以順產, 而家順產成功竟然要開刀拎個胎盤?? 但個感覺真係好似我明明已經柯晒仲要柯空氣咁,因為根本feel唔到個胎盤, 為左唔好開刀,我唯有努力柯空氣, 姑娘亦都好努力幫我揉肚, 最後終於成功俾我柯到出黎啦.... 正常係產房抖一陣就可以上產後房, 但我因為心跳急速而唔可以上房, 一直等到我都唔知幾點終於可以上房喇, 上到房一睇已經係晚上既11點幾....姑娘話要我自己柯到vv先可以落床, 先會推芝芝俾我睇, 好在有朋友一早話定我知, 我生完由可以飲水之前就狂飲,好快我就已經可以自己柯到VV,姑娘都好快推左芝芝黎俾我睇.. (第一眼望清芝芝,心諗:SHIT,點解我個BB咁醜樣.............) 由於我心跳仲係急速, 所以手上既豆唔可能拆走, 姑娘亦擔心我,所以建議我好好休息,芝芝由佢地照顧, 雖然好唔捨得,不過我更擔心唔可以同芝芝一齊出院,所以我都按姑娘講既說話,好好休息,期待可以一齊出院!! 到第2日,我既心跳依然係急速, 醫生就建議我照一照CT,搵一搵個原因, 擔心我係血管塞,不過即日無位,要等多一日, 但我唔想,我淨係好想同芝芝一齊返屋企, 最後同醫生傾好左, 只要我照完無事, 佢就會按時即日俾我出院, 好在最後都無事, 雖然都係搵唔到咩原因心跳快, 不過醫生都照俾我同芝芝一齊快屋企, 只要我有咩唔舒服,即時返去醫院搵醫生就可以了,終於我可以同芝芝一齊離開醫院返屋企喇!!! 後記:對於我黎講,我覺得順產真係一個非常奇妙好值得體驗既經歷, 順產對媽媽復原同BB都係一個好既選擇, 至於大家都講既十級痛,對我個人黎講係可以接受,到而家芝芝9個幾月,我已經完全唔記得左個痛既感覺, 就算我要再生一個,我都會100%揀順產,非常十分建議大家順產呀!!(雖然我唔會再生第2胎) 由真正覺得痛到生完我只係6個鐘左右,第一胎黎講算係非常之快, 芝芝真係一個乖寶寶!! 下一篇就可以講下帶左芝芝返屋企之後點樣係無陪月,得我同老公2個人之下照顧一個初生BB喇~~ 你地覺得芝芝可愛嗎~? 歡迎聯絡合作和活動,邀稿: Email: risako_ka@yahoo.com.hk Instagram: Tszyuchichi
