最近身邊好多朋友都加入媽媽行列，知道佢哋有萬千野需要準備，加上新型肺炎呢段期間，佢地又唔可以隨便出街，眼見個肚越嚟越大，啲野又未準備好，一定心急如焚。記得有咗麵包果陣，工都唔想返，每日係屋企睇呢樣睇果樣，每買一樣野都左諗右諗，又要搵啲產品好唔好，又要做比較，仲要格埋價。人仔細細，點解咁多野要準備，真係做極都做唔完。依家麵包仔一歲，好多野都試過用過，想同大家分享一下。同埋近日有時間，終於的起心肝幫麵包紀錄下日常生活，平時都係影下相就算，依家可以整理一下啲相，等自己易睇啲。 我將要俾準備麵包嘅物品，分咗好個項目: - 衣: BB衣物 - 食: 哺育用品類 - 住: 床上用品，沐浴用品，護理用品/工具 - 行: 外出用品 而我自己就有三項: - 產前用品 - 產後用品 ‍- 走佬袋   今日就同大家先講下BB嘅衣物，好多媽媽都會問，究竟要準備幾多衫先夠啊？底衫要幾多？外出服要幾多？咩係和尚袍，咩係蝴蝶衣等等，好多問題，以下等我逐一介紹。 BB衫分好咗好幾種: - 和尚袍( 短身 ) 0 - 6 個月 @x6 (3厚，3薄) 係底衫既一種，以綁帶設計，可以自已調教鬆緊，而且縫線通常係外面，咁就可以避免刮到BB幼嫩嘅肌膚。 - 和尚袍 (長身 ) 0 - 6 個月 @x2 同短身一樣，不過長度可以到腳仔，初生BB 要好常換片，好多時都唔會著褲仔，長身嘅和尚袍就可以遮埋肚仔，同埋腳仔，咁就唔怕冷親佢哋喇。 - 蝴蝶衣 0 - 6 個月 @x3 同長身和尚袍相似，但腳仔位設有按扣，同埋腳位闊啲，好似蝴蝶咁。通常我會裏面著短既和尚袍，出面就加埋蝴蝶衣。     - 蛤衣( 連身底衫) 蛤衣都有幾款，佢最大嘅好處係包實Pat Pat 位，咁BB 點踢點郁都唔會露到個肚仔出嚟。麵包依家歲幾都著緊，因為周圍又爬又抱，啲衫會縮黎縮去，所以有蛤衣打底就唔洗驚喇。但蛤衣又有好多種:    1: ( 過頭笠，下面按扣) 初生開始 呢款衫初生時係需要由腳仔著上去，咁先唔會整親BB 條頸，對於我果陣仲係新手媽媽，怕應付唔到，所以無買到呢款底衫。等到BB 三個月左右，條頸硬正啲，就可以由頭仔著落去，其實呢款衫好方便，麵包依家多數都著呢款做底衫。 2: (有綁帶，下面包pat pat ) 初生@x4 呢款蛤衣好好，上面綁帶可以調教鬆緊度，下面又包住pat pat ，有啲係手位可以翻轉，包埋BB隻手，連手套都唔洗帶，勁方便。 3: (上下都係按扣) 初生 呢款蛤衣，就全部都係按扣，唔中意綁帶嘅媽媽就啱哂啦。 - 連身褲 (出街衫) 3個月以上@x7 ( 4薄，3厚) 連身褲顧名思義，即係衫同褲連埋一齊。有分全扣款，同埋上身過頭笠下身按扣款。通常出街衫都會簡呢啲，方便易除，換片又方便。 - 連身包腳衫 ( 睡衣) 3個月以上 @x3 呢款衫係包埋對腳，凍嘅時候連襪都唔洗著，非常方便。平時要抱BB，唔係戚起件衫，就戚起褲腳，著呢款衫就無哂呢樣煩惱喇。不過呢款衫一定要買到好岩身，過短會扯住，過長又會不停甩隻腳位出嚟，阻住BB爬行。我通常係冬天瞓覺嘅時候俾麵包著，因為包哂全身，暖笠笠。   咁多款衫，其實最緊要就係方便媽媽，同埋BB 著得舒服，一定要選擇無螢光劑既衫仔。至於要幾多件，我就寫咗我買嘅數量。麵包出世係2月，其實都會凍，所以我有準備厚身啲嘅底衫俾佢。頭三個月，就係短和尚袍加長和尚袍或蝴蝶衣。三個月之後出面可可配連身褲。好凍嘅時候就厚嘅短和尚袍，加厚嘅連身褲，再加包被，訓覺就用swaddle，加被。係同BB著衫前，記得先將兩件衫套好，咁一次過著，就唔洗郁BB咁多次喇。 *@ 係代表我係麵包初生時準備嘅衫 另外我仲買左: 手套: 5對 襪仔: 5對 帽: 2頂 口水肩: 8條 包被: 1厚，2薄 Swaddle :2件   相片來源:mides,next,primeval-baby,pure spot #newbornbb#bbbuylist#初生BBbuylist#初生BB清單#產前準備#購買寶寶用品#寶寶用品#初生寶寶#初生寶寶購買清單#初生嬰兒衣物#BB衫 Facebook: www.facebook.com/zoeandbread/ Instagram : https://instagram.com/zoe_n_bread?igshid=1m1tq94sbx35s