上胎陀住和牛B嘅時候，我有妊娠糖尿，所以今胎QE就安排咗兩個「飲糖水」嘅期俾我。 好好彩，喺13週嘅時候我勉強合格，唔需要展開我嘅篤手指孕期。 來到27週嘅時候，我再去第二次「飲糖水」嘅期。   今次一如以往，空腹去抽血，然後就飲糖水。飲完糖水，我如常地離開醫院散步1.5小時再返醫院抽血。   結果，第二朝一早我就收到醫院電話通知我中獎啦… 仲邀請我出席佢哋嘅「全日血糖測試」，有晒上胎經驗嘅我…   知道要收費(香港居民$195)，同時無床位…我個心不知幾不爽。 因為「全日血糖測試」係需要喺醫院逗留至少12小時，仲長時間過返工呀!     當日需要空腹返醫院，驗一次空腹血糖，再抽一支叫血，用嚟Check「糖化血色素(HbA1c)」。 * 糖化血紅素(HbA1c) 係可以反映病人過去一個月嘅血糖平均數。   完成以上步驟，就可以食早餐「粥」。   食完，就有醫院嘅營養師講座及分享一啲餐單俾我嘅呢班孕媽媽。 上胎我記得好空範，今胎原來有埋小冊子，非常方便!     目標度數： 餐前: 4-5.5 餐後: 4-7.5   邊類人容易患上妊娠糖尿病呢? - 家庭成員入面有人患有糖尿病者 - 年齡35歲或以上 - 體重指數(BMI)偏高者 - 曾經患有妊娠尿病者 - 曾生產巨嬰者 (嬰兒出生時體重4公斤或以上)   ^ 體重指數(BMI)   以下就係患有妊娠糖尿孕婦嘅飲食教學;     可以選擇嘅食物都多，只要留意食物嘅份量，計住數就唔會超標。     以下就係可以參考嘅餐單，每餐要食嘅碳水化合物份量。     最後，當然就係唔少得…交功課俾醫院啦!  暫時一星期篤2日手指驗血糖，如果控制得好，篤手指嘅次數會變成一星期一日。     講座完結都差不多餐後2小時，又可以進行血糖測試 (篤手指)。 同時，姑娘都同我哋介紹有咩血糖機醫院有優惠可以喺醫院到買。   驗完血糖，姑娘就會派茶點一包梳打餅及一盒脫脂奶。     大概12點半左右，就可以食午餐，都好豐富呀。     食完隔2小時後，再篤手指，我嘅血糖都係合格嘅。   然後，又有茶點食。再等到5點半驗一次血糖，就可以食晚餐了。     餐後再等2小時，驗埋血糖就可以返屋了!!   自己篤手指唔可怕…醫院用嘅針已最可怕，正所謂十指痛歸心。 姑娘真係好恨，全日篤咗5次手指…有一次係我自己試機自己落手。 其餘嘅都係姑娘代勞，每一個傷口都痛左2-3日…T^T     【 二 寶 孕 記 】妊娠糖尿測試之飲糖水 (一)   舊文重溫2015： 陀B日記 - 我有... 妊娠 糖尿 !! -------------------------------------------------- 歡迎聯絡我&和牛B: chungying56@hotmail.com Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。