【胎位低、子宮肉粒、胎水過多、追磅、B鏈……跟各位孕媽媽的小分享】 話咁快，懷孕來到38週。上星期足月後，安心得多，但同時亦非常緊張。雖然第三胎，身邊朋友都話「有經驗，一定唔怕啦」。但。。。生小朋友喎，點會唔怕？正所謂，每位生產嘅媽媽，都好似係鬼門關兜完個圈 (唔好意思，可能嚇親各位孕媽)。而且，上一胎已經係六年前，記憶濛糊。今胎我就好似一個新手媽媽咁，從頭來過。趁細佬B 未出世前，就分享一下呢十個月嘅經歷。 工作性質關係，懷孕第13週，便要由前線，暫時轉職到辦公室。呢樣，係我最最最唔習慣嘅事，一下子要返一至五，朝9晚5。對於我喜歡輪班，而且可以彈性調更來說，呢個轉變實在痛苦。但，無他的，習慣便是了。 頭兩個多月，懷孕反應唔算大，食慾正常，精神體力都好，冇暈冇嘔 (回想第一胎陀哥哥時，嘔到七彩，搭車一定攞住膠袋，行行下街又要衝去廁所嘔)。不過，當踏入第12，13週，突然嘔咗第一次，接住日日嘔，餐餐嘔，嘔完全身無力。就係咁，我嘔到足足五個月。手袋長期放住一個膠袋，同埋梳打餅了。   呢五個月，雖然嘔得厲害，但胎兒大細正常。始終，媽咪身體結構係偉大的，無論嘔幾多，都一定會好好照料胎兒，將身體所剩嘅營養供給胎兒成長。 而我個肚肚，因為第三胎，肚皮較鬆，較早開始見肚。而且胎位比較低墜，醫生建議我少走動，避免胎兒持續陀得太低，會早產流產。呢個時期，亦做咗好多測試，包括三個月嘅唐氏，同埋五個多月嘅結構超聲波，幸好全部順利通過。 不過，右邊子宮經常會痛，有幾次痛到行唔到，感覺係被搣被扭嘅疼痛感。特別叫醫生照一照，發現子宮壁有一粒厚肉，胎兒漸大，令肉粒受壓而痛，但懷孕階段，唔會做任何手術，只能繼續觀察。 同時，醫生話我胎水嚴重過多，胎兒比正常大兩週，要我驗血糖，仲建議我減食，食「低醣餐單」，每日得千幾卡路里 (我心諗，一向食得唔多，仲減？)。明明一星期前，結構超聲波報告，顯示我胎水正常，胎兒大細非常好，點會相隔一星期，就突然變大？老公提議換另一個醫生再檢查。 未搵到另一位醫生覆檢前，我每日都好緊張，好害怕，肚餓都唔敢食。果時我諗，點解一個大肚婆，要減食？究竟醫生係咪真係驗錯？一個月後，終於約到另一位醫生檢查，醫生話「個胎一d都唔大，反而係過細，細咗兩週」，安全起見，做個胎兒心電圖，確保胎兒、子宮功能正常。 至於胎水，都在合理範圍內，亦唔需要驗血糖。果刻，我放下心頭大石，但因為曾經減食而令影響胎兒過細了。 於是，接下來，我要落力補充營養，希望可以追磅。隨住胎兒成長，亦開始頂胃，唯有少食多餐，高蛋白質，每日兩份奶類，不可少。醫生亦話不妨食多少少甜，根本無需減食。   今日，應該係我生產前最後一次超聲波產檢。BB 仍然是細細粒，但醫生安慰我「生完努力d餵佢，做多d運動，會長高長肥的，唔好擔心」。估計出世至少應該有2.5kg，起碼唔洗瞓暖箱吧。 另外，一星期前，做咗B鏈測試，不幸地中了，亦令我非常憂心。雖然呢隻菌好常見，身邊認識一半孕媽媽都中咗，佢哋話一入到產房，打兩枝抗生素就冇事。但問過朋友，話打完最好有兩小時先生，確保藥力生效。但我怕呢胎生得好快，趕唔切。醫生開咗口服抗生素比我食住先，雙管齊下。   經歷上兩胎嘅順利，相比之下，今胎更覺一點點艱難。懷孕媽咪，無論生第一胎，第三胎，所經歷嘅種種，都好偉大！願各位準媽咪，生產順利。共勉之。 最後，分享一下孕照先。前兩胎都無影過，今次第一次影，珍貴嘅留念。