上集講到4位醫生人手同我開宮頸，雖則好痛但佢地咁樣開完個宮頸的確開始開啦，係依個時候開始笑氣已經無用，而想生個種便意一直咁加強，幻想下有一舊西瓜咁大舊屎好急好想出黎但個屁眼得針孔咁細，順產就係依種感覺 宮頸維持住每2小時開2-4度ge節奏，而3位實習醫生亦每2小時入黎同我拳交3次，我生完依胎都真係唔知咩叫檻介，去到9點幾，宮頸開左4度，我個下係好想求醫生同我開刀，因為真係好痛，條腰個種痛我唔識點樣形容，要夾硬形容我只能夠話係比架坦克車不斷前後輾過，完全無得抖下，陣痛一次接住一次咁黎 到11點幾到醫生黎到我已經無力亦無野想發表，自動波擘大腳，心諗「黎啦，我頂得順」，醫生居然帶黎好消息就係子宮頸開左8度啦，好快可以試下生，個下我真係重燃希望，迫自己堅持落去，陣痛黎時盡量忍住唔好屙 去到6/11凌晨1點，助產士一推門入黎就話「子宮頸應該開得差唔多啦，媽媽我地依家試下生啦」 set好曬個陣之後，佢一揭開塊布剛好我陣痛黎又忍唔到屙出黎，助產士即刻叫停我「媽咪你唔好屙住呀，未蚊尿喉呀」 然後老公同我講已經見到bb個頭，個下陣痛完左，助產士即刻蚊走尿喉，摸左一摸妹妹門口，然後叫我打側訓係到生，老公負責幫手托住我隻腳，唔準叫出聲，出力時盡量hold長道氣，但我個一刻其實已經好餓好攰，仲要出力，真係有想暈ge感覺，用力用左3-4次到，助產士就蚊到鋼牙b出黎，忍左13個鐘ge「屎」終於屙到出黎啦⋯⋯⋯⋯ 老公即刻剪臍帶，剪完同我講似剪膠喉-.- 隨住鋼牙b出黎，d羊水一次過流埋出黎，個種感覺係爽ge，我亦都可以抖返啖大氣， 鋼牙b出黎後等左有30秒都未聽到佢喊就覺得奇怪，平時睇戲唔係一拉隻b出黎幾秒就打喊佢家咩？話口未完就聽到喊聲了，鋼牙b順利出世了！ 助產士再黎按我個肚，話將個胎盤按埋出黎，而按肚亦可以幫助子宮收縮歸位，依個過程都痛痛地，但無陣痛咁痛 姑娘抱鋼牙b黎話我知幾點幾分出世，確認個性別，話埋比我聽幾重，然後要我重覆上述資料，跟住就抱鋼牙b去包毛巾再帶返過黎幫我地一家三口影相，估唔到公家醫院都會同我地影相仲曬埋出黎比我地  影完相，姑娘就帶鋼牙B黎我胸前比我抱住，而助產士就轉戰我妹妹，因為我無剪到妹妹，所以妹妹自然撕裂係需要Z字形咁縫返，佢同我拮左2針麻醉都無等2分鐘就同我縫妹妹，大約拮左我10幾下，我估拮一下即係縫一針咁我都縫左10幾針⋯⋯⋯每一針都仲歷歷在目，縫完就沖洗下下面，就準備上返病房了 係產房個13個鐘就係咁過，期間我係無點同老公講過野，因為好痛，講咩都幫助唔到個痛楚，但都辛苦佢除左去廁所外都坐係到陪足我13個鐘