愉景新城D。Park近年變身成為親子商場，好多嘢啱小朋友玩！於是今日約咗幾個小朋友一齊去Donut Village入面嘅Donut Cafe玩 我哋行到入去Donut Village，見到都幾多人，本來仲好擔心親子餐廳入面會人頭湧湧！點知，一到去發現地方好闊落，而且有人數限制，一啲都唔會覺得迫 負責訂位嘅媽媽話，呢度只能夠早七日定位，我地10/3來玩，佢3/3一開舖就要打去訂位㗎啦!! 全日分四個時段： - 11:00 ～ 13:00 - 13:15 ～ 15:15 - 16:15 ～ 18:15 - 18:30 ～ 21:00 $$ 周未（任何時段都一樣錢） 大人最低消費$200，小朋友最低消費$100。 星期一至五 （頭三個時段） 大人最低消費$150，小朋友最低消費$100。 星期一至五 （最尾的時段） 大人最低消費$180，小朋友最低消費$100。$$全部消費額都可以用來叫嘢食！ 入場先要除鞋、洗手、放野入locker！   睇吓有咩玩 一入場先見到一架大大嘅飛船，小朋友可以爬上去㗎！ 一路沿着繩網爬，就可以上到去一條圍繞餐廳用餐範圍嘅通道~   上面有簡單嘅玩樂設施~ 然後就有一條超有速度感嘅滑梯‘sir’返囉黎！ 玩樂嘅地方亦有簡單嘅煮飯仔玩具，同埋有少少嘅木火車玩具。 細啲嘅小朋友爬唔到上去可以玩乜啊？有個區域擺咗啲軟積木，細啲嘅小朋友可以喺入面玩~ 旁邊就有啲兒童枱凳同埋搖搖木馬! 繩網下面亦有一個軟墊可以比佢跳下！ 玩樂嘅設施雖然唔係好多，但爬上爬落其實好放電，玩完一個鐘已經出晒汗！要坐低休息一陣!!! 呢間親子餐廳嘅食物幾好食，我哋試過唔少親子餐廳，呢間嘅食物質素確係中上，而且價錢唔係離晒譜咁貴！不過選擇就唔係好多～   我哋都試咗好多食物！ Carbonara ($118) & 青蔬果汁（$45）   Mac & Cheese ($108) 小朋友好鍾意食!   照燒雞蕎麥面（$118） 菠蘿豬仔骨 ($168) 味道唔錯，不過乾咗小小，菠蘿好甜呀！   Sushi Farm ($108) ☕️飲品嘅選擇反而比較多，有茶、果汁、咖啡等等！最驚喜係Donut Shake同Donut Floats都會跟埋個冬甩！可以叫佢冬甩另上，咁就唔使怕杯飲品整濕晒個donut！ 沖繩黑糖Latte $48(小小偏甜啦），仲跟埋個donut     Mango donut shake ($58) 基本上一大一小黎玩，食兩個main course (例如一個意粉、一個pizza)，每人叫杯嘢飲，已經夠最低消費，而且真係食得飽! 另外，呢度嘅洗手間值得一讚！ 有兩格家庭洗手間，爸爸媽媽帶小朋友去洗手間都唔會尷尬！ 仲有哺乳室同育嬰室，帶小Baby來玩都冇問題！ 要帶小朋友去玩就記得訂位啦！ 地址：荃灣青山公路荃灣段398號 D・PARK愉景新城L1（顯示地圖） 電話：2617 6773 營業時間：星期一至日 11：00am-9：00pm ********************************************************************************************** 喜歡我嘅分享嘅話，記住like同follow我個Facebook page呀:) https://www.facebook.com/natalie.nathan.mum/   #親子活動 #親子餐廳 #室內活動 #donutcafe #愉景新城 #好玩又好食 #放電一流