臨近聖誕又到咗開趴地嘅好時機,媽們又可以出手攪下新意思。 趁小JM訓咗,深夜又手痕痕,於是就用咗屋企現有嘅材料來整咗四款口味嘅「迷你蝴蝶酥」。 蝴蝶酥製法簡易,而且味道多變,可以隨意變化出多種口味, 而且迷你版啱晒愛美一族,亦符合小朋友嘅小嘴巴。 材料: Pampas酥皮 一張 果醬 紅莓、杏子、士多啤梨味 柚子漬 做法: 1.) 取出一張Pampas酥皮,並將酥皮分為四等份,備用。 2.) 將柚子漬取出,並將柚子皮切成小粒,備用。 3.) 將柚子漬及果醬均勻塗上酥皮之上。 *可根據個人喜好而加多或減少果醬喔!* 4.) 將酥皮分為六分,慢慢向內摺。 先將兩邊各內摺一次,再向內摺, 最後對摺即成。 小提示: 摺好後建議可放入雪櫃稍為雪至微微變硬身即可。 會令切出來嘅形狀更靚,而且仲易切啲添。 5.) 將蝴蝶酥卷冷藏十數分鐘後即可取出切成小片。 *最好用利啲嘅刀,而厚度約為伎手指咁上下,就會更有咬口* 6.) 切成小片後要將頂部打開,而底部可以稍為輕輕壓實,待焗好就會變成心形架啦。 7.) 整好形狀之後就可以排好,準備拎去焗。 記得要留足夠空間俾蝴蝶酥發大喔~^^ 8.) 預熱焗爐約180°C,再將迷你蝴蝶酥放入,焗十分鐘左右即成。 個人比較喜歡柚子,除咗味道清新之餘,仲有粒粒嘅果肉,口感加倍!