我生BB嘅時候係39週3，事緣係醫院做產前檢查嘅時候，醫生照超聲波發現胎水偏小... 而且我又有妊娠高血壓... 所以醫生建議即時入院做催生。 由於事發突然，我完全毫無心理準備！老公即刻飛的士返屋企攞走佬袋。我就自己入院係病房換好衫，之後就直接自己行入產房。好印象深刻瞓係病床嘅時候係晚上六點。姑娘對我都好好奇問點解咁夜都仲做催生，因為好少會咁樣做，當時我就意識到自己原來都比較危急...  瞓咗落床姑娘問咗基本資料之後，就開始接駁儀器聽BB嘅心跳同埋做人工穿水。當時可能我比較緊張... 覺得好痛姑娘就建議我吸笑氣.. 我唔識就係咁聞.. 好快... 就頂唔順.. 天旋地轉心跳加快，醫院個天花板啲燈係咁喺度轉.. 就好似TVB啲劇集啲人要往生一樣.. 之後... 我忍唔住問有冇人啊？我係咪死得啦？幫我催生嘅醫護人員有回應我... 話你笑氣聞得太多啦... 我先知原來我死唔去：） 之後就唔敢聞咁多.. 慢慢就恢復正常..無耐我老公就嚟啦.. 因為夜晚嘅時間，所以姑娘都開咗電視俾我睇... 分散我嘅注意力！ 大約八點到.. 我仲記得係睇緊愛回家嘅時候，就開始有鎮痛嘅感覺... 開到兩度嘅時候就係咁問姑娘可唔可以打止痛針？姑娘回覆四度之前打比較好.. 但係因為BB都是心跳唔穩定.. 所以都唔肯幫我打！之後每一次姑娘入嚟我都會問佢開到幾多度？打得針未？因為我比較怕痛:P 當我問咗幾次之後.. 姑娘終於話可以打啦！之後唔知係咪心理影響.. 感覺上就冇咁痛！到最後我覺得自己應該係暈咗或者係瞓着咗... 冇乜知覺.. 好似斷哂片咁！ 當我開始清醒嘅時候已經係凌晨兩點幾.. 係醫護人員拍醒我「太太.. 太太醒下啦！而家要生BB啦」之後開始用力Push，我自己覺得個感覺就好似開大咁，但係要用好大力.... 之後個感覺好似虛脫咁，最記得阿仔臨出世果一刻我其實已經冇咩力.. 個心一諗到點佢都要出世！都要屙佢出嚟！就係呢一刻嘅信念～啊仔就成功出世啦（事後老公同我講好多次，其實佢都好緊張！因為佢見到阿仔個頭出下黎又吸返入去，三次之後先成功出世） 之後聽到BB喊聲我都唔敢望！好怕佢成身血～醫護人員問我BB係仔定女我都係瞌埋眼回答！因為我一早知佢性別！最後醫生聯針嘅時候發生一段小插曲：就係我問得太多笑氣，好似喺度亂講野... 我同個醫生講生仔真係來回地獄又折返人間... 老公見狀即刻抽走我嘅笑氣，又唔知點解我仲有力同我老公一齊喺度爭！最後姑娘幫我地一家三口影嘅合照呢場鬧劇先結束.... 推入普通病房，再同BB分開，我就即刻可以休息一陣.. 瞓醒姑娘就將BB推入我個床位到同我講.. BB體溫偏低需要趴係我嘅心口取暖..... 下晝姑娘就通知可以轉私家病房，咁岩係探病時間.. 屋企人仲可以幫我將所有物資拎上房！安頓好之後就好快有姐姐嚟送餐（姐姐解釋嗰餐係上一手揀落問我㗎唔介意）有得食我當然唔介意啦！...  人走晒就真係開始自己一對一咁對住BB.... 老實講當時真係好雞手鴨腳，連掃風都唔識.... 好好彩姑娘好有心機咁教我！因為我係緊張大師自己麻煩到佢哋都唔好意思:( BB唔知係咪因為黃膽嘅關係瞓得好好... 隔離床位BB喊佢都冇反應繼續訓... 第二朝瞓醒BB就開始做檢查，聽力測試所有嘢一切都正常! 晏晝仔仔班契媽們就來探BB，晏晝好好冇限制人數！所以成班都可以一齊入嚟佢哋！走咗之後我就要自己單獨做檢查到夜晚.. 探病時間就有人數限制每次都只可以有兩個親屬入嚟，所以班朋友都係門口度排隊.. 搞到我都唔好意思要佢哋等咁耐.. 到夜晚BB食完奶開始嘔奶..而且條氣仲發出奇怪聲音.. 所以就交俾姑娘放入觀察房到觀察！到凌晨三點姑娘通知BB因為嘔奶太多次送咗落NICU度觀察... 當晚擔心到全晚瞓唔到.. 第3日我就出院..日日來回屋企醫院探bb！ 詳情下一篇在同大家分享.. 私家房環境圖（二人房）   歡迎邀稿試用//參加活動: Email: Moseskwan0901@hotmail.com Instagram: Moses.dairy Moses Kwan // 奶仔  Birth : 1 Sep 2018 Male       <br />