今次唔係介紹咩新場，而係又想提提大家，又到咗摘士多啤梨嘅旺季啦~     我家和牛B好鍾意食士多啤梨，所以知道係收成旺季，又點可以錯過呢!!   嚟咗兩年，今年可以完全放手俾和牛B去摘士多啤梨啦~       我哋今次繼續都係去老地方「錦田鄉村俱樂部」摘士多啤梨，呢到除咗有士多啤梨摘仲可以野餐、餵羊餵兔仔、玩好多親子嘅機動遊戲、彈床同埋BBQ，呢到除咗適合親子，亦適合約齊一大班朋友聚會嘅好地方。           今次再嚟，大草地嘅兒童遊樂設施都有新添置。暫時都仲好新淨~不過由於放喺草皮上面，難免會有少少泥濘同埋有塵啦~       物價上漲，上年嚟摘士多啤梨嘅價錢亦相對提高咗。 最平嘅品種係法國$120/磅 (其實唔係好平，不過就俾小朋友體驗一下，自己摘士多啤梨)     今年仲多咗今年超HIT嘅淡雪士多啤梨，不過要成$200/磅，場主話只種一塊田，同埋要近農曆新年左右先有收成。想摘淡雪士多啤梨嘅讀者，要留意哦~   拎咗藤籃後，就可以去士多啤梨田出發，隨便採摘你鍾意嘅又紅又大士多啤梨啦。     士多啤梨田都相當大，有好多塊田，可以慢慢揀要咩品種。       今次我哋手摘咗法國品種，呢到摘咗$52。       靜靜雞話俾大家知，剪士多啤梨嘅時候，記得要剪貼啲，個椗唔好留太長就會輕磅少少o架啦 (哈)     【元朗@錦田鄉村俱樂部】 http://yl.com.hk/ktcc/ 地址：新界錦田水尾村230號     舊文重溫: 【親子好去處】摘士多啤梨 x 動物樂園 x 帶寶聚會好去處 x 錦田鄉村俱樂部好好玩 【親子好去處】近距離餵羊、錦田鄉村俱樂部好好玩 (續)     -------------------------------------------------- 歡迎聯絡我&和牛B: chungying56@hotmail.com Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。