近期嘅病菌風波又令到大家都瀰漫著一股擔心嘅感覺。   我家嘅長輩們亦不例外，都對小JM嘅健康甚為著緊。 為咗可以令長輩們擔心少一啲， 除咗外出時做足預防措施之外，就係要係日常生活及飲食方面落手。   因為大小JM都唔會食煲湯肉類嘅關係，我其實都甚少買肉類來做湯料， 一來免卻浪費，二來慳錢！ 不過普遍長輩都會認為煲湯加肉類係必須，可以令湯變得更鮮甜。 但其實呢個說法對小JM媽而言就唔成立啦！ 事實上仲有好多不同蔬果及豆類都係可以帶出鮮甜嘅味道， 而紅腰豆、粟米、甘筍等都有相同功效架。       【佛手瓜甘筍栗子粟米湯】 材料： 甘筍 2條 粟米 1條 佛手瓜 2個 無殼栗子 約8~10粒 蜜棗 1粒 南北杏 適量   材料功效一覽: 甘筍　　－　有助清理腸胃 粟米　　－　有健脾、開胃、消滯及利尿嘅功效 栗子　　－　可補腰腎，但不宜多吃，尤其係小朋友喔！ 佛手瓜　－　具有疏肝、止咳、健脾開胃嘅功效     做法： 1.) 先將全部材料洗淨，備用 2.) 將佛手瓜開邊，再以鐵匙除去核，並切成八小件，備用 3.) 甘筍切成小段，備用 4.) 粟米可因應需要而切段 5.) 預備一煲水，煮滾後放入全部材料，轉細火再煲45分鐘即成      *可按個人需要加入鹽以作調味*