媽媽我其實麻麻地韓國, 什麼韓星呀韓劇呀running man呀0個d, 冇追過~ 係未結婚前比哥哥毒到我睇千頌伊咁大把~ (因為想睇靚衫XD) 韓式食物最多咪去食韓燒囉~~ 睇完千頌伊咪食埋炸雞囉~ 但有咗米豬之後, 唔知點解, 成日都走去某間好出名ge韓國餐廳 (X家) 食牛骨湯飯, 臨入院開刀前一日都要去食返次先安樂, 早排又同表妹小姐食咗, 連米豬都欲罷不能, 軟棉棉ge牛牛, 清甜ge牛湯, 仲有甜甜蘿蔔同粉絲, 丫~! 我身為大廚個孫, 某奶油整唔到ge~!!   早幾日去買餸, 就去凍肉姨姨度問, 因為要煲牛骨湯, 咁要買0個舊牛骨呀~~~ 0個舊好厚切ge牛仔骨呢~~~ 凍肉姨姨一講就明, 仲即刻搬咗排牛肋骨出嚟, 問我要幾多即刻切比我呀~~ 連牛骨都比我買到~! 一於開工!! 材料: 湯底: 昆布 6塊(手掌攤開咁大) 洋蔥 半個 蔥白 2條 白蘿蔔 1/5條 湯料: 厚切牛仔骨4-6件(視乎大小) 白蘿蔔 2/5條 甘筍 1條 紅棗 6-8粒(我冇落) 韓國粉絲 半包 蛋 1隻 金菇 1包 調味: 鰹魚醬油 2湯匙(整咗最後冇落過)   *D相有d亂因為太好味我2星期內整咗2次 XD   做法: 湯底: 1. 昆布用浸布抹乾淨表面灰塵, 水大半煲(約2L), 浸昆布2-4小時(我浸咗2個鐘) 2. 白蘿蔔批皮切件, 洋蔥一開4, 蔥白放入煲內, 水滾計煲20分鐘, 撈起湯渣 材料: 1. 牛骨沖乾淨血水, 跑活水後晾乾     2. 白蘿蔔, 甘筍批皮切件, 紅棗洗乾淨(今次冇落) 3. 全部加入已經撈起晒渣ge湯底度, 中大火煲15分鐘, 期間會有牛肉泡泡浮面, 撈走佢, 大約15分鐘度就再冇泡泡出, 轉細火煲個半鐘   4. 韓國粉絲跟包裝指示煮熟   5. 蛋打散後煎成蛋皮, 切絲     6. 將韓國粉絲放底, 放返d牛上去, 落已經洗乾淨ge金菇再煮多幾分鐘, 金菇熟晒就放蛋絲上去, 食得~   講開講埋~ 鰹魚醬油做法 材料: 水 半杯 豉油 1/6杯 糖 半茶匙 木魚/柴魚 1/4杯   做法: 1. 水+豉油+糖中大火煮滾 2. 落埋木魚/柴魚轉細火煮6分鐘 3. 隔渣, 入樽~   ~完~   我真係冇諗過煲得個半鐘d牛已經淋晒~~ 個湯仲超甜~!! 個醬油完全冇用過~ 而家放咗入玻璃樽放入雪櫃, 遲d可以繼續用~~~   煮食小貼士: 1. 第一次整就去凍肉舖買牛, 第2次我咁啱出咗尖沙咀行街, 就去咗韓國街, 個姨姨就介紹咗一隻專for牛骨湯用ge牛肋骨件, 第2次煲完真係冇咁肥~ 2. 都係怕肥ge話可以出水之後剪走小小肥, 煲好之後用隔油壺隔走d油, 0個啖湯正到不得了~ 3. 蘿蔔都係切件好味過切片XD 4. 煑2次都唔記得買紅棗, 冬天要記得買埋先~ 補d丫MA~ 5. 留隔夜仲好味!!!!! (不過小朋友食就唔好留喇, 即日食咗佢la~ 但食淨唔好0徒呀~ 留返第2日煮麵呀~!!)   第2次整大煲咗, 我留返食淨0個d第2日煮烏冬, D味仲正過尋晚2倍~!!!!!! 當我好開心咁食咗幾啖時...... 就瘋狂地比一隻KO完一大碗大人飯冇半個鐘ge米豬打劫...... 係咁走埋嚟"白白!!" (蘿蔔個蔔)   仲有"麵麵"!!    真係好方便呀一煲過有湯有肉又有菜~~~ 煲埋飯就一餐喇~~~   米豬豬的page~ 每日都update~  歡迎各位like&follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/