呢幾日睇新聞, 真係睇到我對眼噴火! 邊單? 咪 【侍產假】張宇人指「一天都不應該有」：以前我們無又如何？ 呢單囉!! 睇返其實張生都有兒有女, 我真係鄧張太淒涼!! 生仔咁辛苦個老公竟然覺得你生仔係你ge事, 我返工大晒! 以前冇, 而家都唔可以有? 咁你熄鬼晒你屋企同Office d冷氣機佢!!! 以前都冇冷氣啦, 又如何????? 點解男士要有侍產假? 好簡單, 一個女人生完BB, 淨係生理同心理上ge變化, 已經唔係3日就可以handle到, 你以為得媽媽生完BB心理大轉變? 其實爸爸都好大影響!!! 尤其是新手爸爸!! 比幾日時間佢調節吓心態, 學吓點照顧BB, 仲有產後媽媽, 唔係好過份掛? 況且媽媽生完BB之後, 其實更加需要爸爸响身邊支持同陪伴, 一個女人, 懷胎十月, 電視話齋我地賭上生命身材同事業嚟生個BB, 生完搵個老公依靠吓, 你同我講一日假都嫌多??? 我睇完新聞除咗冷血, 涼薄之外, 真係諗唔到有咩可以形容!! 田少話齋, 一世人最多咪得幾日侍產假... 女人生仔, 法定有10星期有薪產假, 只要你懷孕時已經連續受僱40星期, 已經書面連醫生証明通知公司已懷孕, 如僱主有要求, 需要提供懷孕及預產期証明, 咁就可以享有10星期有薪產假, 至於0個段時間d糧點計, 可以參考返勞工署網頁 男士侍產假, 其實都係近幾年先立法有 三 大 日 有薪侍產假, 詳細資料可以參考返勞工署網頁again 或者張生唔明 "侍產假" 對新手爸爸媽媽有幾重要, 咁等我講吓, 响我屋企, 米豬爸爸當時公司侍產安排係點 米豬爸爸公司的 "生小孩package" 侍產假 - 10日full pay (可不連續放) home office - 1個月 生小孩medical - 5萬, cover產前/後檢查, 生BB住院及醫生費 適逢上年生米豬時搭住個農曆新年, 爸爸足足响娘家陪我坐咗3星期月(10日侍產假+幾日大假+農曆新年假), 先唔計住院0個幾日, 其實我都有叫爸爸唔駛日日嚟, 不過佢又好想親子時間抱抱米豬, 所以都拎埋假過來陪我 學做爸爸的米豬爸爸, 成世仔第一次抱BB 到出院一刻, 媽媽我開始淆底 (其實米豬已經好乖) 返娘家坐月, 理應要風得風要雨得雨, 奈何我要奶冇奶........ 繼而有小小抑鬱......... 總覺得自己湊米豬唔掂, 婆婆一抱佢就唔喊, 同埋擔心好多(無謂)野, 例如: 米豬爸爸本身唔鐘意小朋友, 會唔會唔睬米豬, 米豬成日喊會唔會令爸爸好討厭佢..... 雖然晚晚半夜隻米豬就燈籠咁大對眼唔訓覺, 令到我同爸爸投晒降, 仲要水汪汪亮晶晶咁望住你, 要同你傾計 米豬表示日頭光光地好訓d, 夜晚要同媽媽談心....... 你好彩, 爸爸媽媽我地夜訓開........ 爸爸一直都响身邊陪伴同支持, 其實我知道, 爸爸都好大壓力, 要面對一個新生命, 一個唔會同你講道理講邏輯ge BB, 爸爸响侍產假期間同媽媽我每日不斷咁學習, 响婆婆身上學吓點先暗到隻仔訓, 學習吓米豬咩野喊聲係咩事 講你都唔信, 爸爸比我更早捉到米豬喊聲ge路, 佢好早已經分到扭計, 肚餓同濕片喊聲, 我差唔多1星期先捉到佢路 米豬3星期大時, 爸爸侍產假+大假放完, 要返工了, 只可以每日放工盡量趕過嚟陪我地(爸爸份工其實好忙的.... 試過1000踩到0330), 我仲好記得爸爸响娘家執野走0個晚, 我忍唔住係咁喊, 因為我知道, 今晚開始, 得我同米豬孤軍作戰, 抱到好攰, 好想呻吓0個陣, 床邊已經冇人...... 仲有好多好多講唔出ge不安, 總之就係不停咁喊喊喊, 爸爸都好心痛, 唯有抱住我話"我每日都會趕返嚟!" 其實, 爸爸呢3個星期, 對我情緒支援係好大, 佢自己都學咗成個星期先識得同米豬換片餵奶掃風, 學識點同米豬相處, 如果得3日, 真心講, 分分鐘連個仔咩樣都未記得.......... 之後, 爸爸就開始咗2星期屋企公司娘家3頭走(冇計, 娘家返佢公司極唔方便......) 直至米豬滿月後1星期, 我地終於返屋企喇~~~ 返屋企之後, 爸爸就開始home office 1個月喇~~ yeah~~ (不過一星期都有一日要返公司開會, 但比起日日得我同米豬响屋企, 已經好幸福) 某日我食完敏感葯wing到死, 爸爸開完會返嚟即刻抱米豬哄佢, 等我可以休息, 好強大的背影 你話侍產假有咩實質用途? 我只可以同你講, 係學習, 係陪伴, 亦都係成長, 讀咁多年書, 學校冇教過你點做人父母, 生仔亦唔需要考牌, 每個BB性格唔同, 你個B用呢招work唔等如我個B都可以, 湊仔只係一個不段try and error ge階段, 冇捷徑, 冇天書, 冇雞精, 想出貓都冇得出, 係對爸爸媽媽人生最大ge考驗 如果你話考會考(出賣年齡tim), 一科考3個鐘, 要用2年時間學習同準備; 咁請問, 得3日比你去迎接一個新生命降臨, 一份考你一世ge卷, 又係咪一個合理ge時間? 發up瘋完畢 米豬豬的page~ 每日都update~ 歡迎各位like&follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/
