平時煮飯就煮得多, 湯呢~ 都成日煲ge~~ 不過好多時都腦閉塞諗唔到煲咩好, 所以我間唔中都會問吓菜檔姨姨有咩合時湯水啱我地同米豬飲ga~~ 菜檔姨姨睇住我飄咗個維港咁嫁過來, 有時都有d筍野益吓我ge~  呢個湯就係佢教我煲ga na~   青紅蘿蔔粟米栗子印度椰子煲豬展   材料其實都寫晒响個湯名度, 包括 青蘿蔔 1個 紅蘿蔔 1個 粟米 1條 印度椰子 1個 栗子 15粒 (其實唔係咁死一定要15粒ge, 因為份量都係菜檔姨姨執比我, 佢話話佢賣咗10蚊比我wo~ 佢賣比我0個D係去咗殼去咗衣ga) 豬展 1大舊 (我同豬肉佬叔叔講要舊大豬展佢就比咗呢舊我, 收咗我$73) 蒜頭 2瓣 薑 3片   以下呢2樣可落可唔落 南北杏 2湯匙 無花果乾 1粒   做法:   1. 湯煲落3L水, 凍水落南北杏, 煲滾 2. 蘿蔔們去皮, 切碌, 粟米切件, 印度椰子切條 3. 粟子洗多次之後同其他菜類材料備用 4. 豬展切件(約1.5cm厚), 開細煲或鑊, 加2瓣拍扁去衣ge蒜頭同薑, 凍水落肉, 開中慢火, 到水就快滾時就將肉撈出 (又稱跑活水, 咁樣出水法ge肉煲完出來d湯真係清甜好多ga~~) 5. 將菜類食材全部倒晒落個煲度 6. 水滾後加肉, 大火煲15分鐘, 之後轉最小火煲2小時 7. 飲得  駛唔駛飲到咁狂野呀仔???   煮食小貼士: 1. 南北杏止咳平喘, 我間唔中煲湯都會落, 但近期有聽過d人話佢地有毒, 不過中醫就話煮45分鐘以上可以消除毒素, 所以一開始就落就啱喇 2. 印度椰子都係清潤有益ge食材, 但其實佢飽和脂肪比例比一般椰子高2倍ga~ 所以一個月煲一次好喇 3. 栗子健脾強腎, 煲完d湯又甜, 其實咩湯都可以落返幾粒ga   米豬豬的page~ 每日都update~ 歡迎各位like&follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/