話說果醬媽中左獎之後，其實都隔左成個幾兩個月先發現（連月經成個月無黎都無發現……）而發現中獎既過程都幾搞笑。我仲好記得個日返返下工，無啦啦開始頭痛唔舒服，仲出現傳說中既作嘔作悶，但係因為試左幾個月都無中，所以我當下好快否定左自己係有左既可能性(驚希望愈大，失望愈大)。當日仲為左見客遲到跑左半條街。下晝返到公司，我就同老細講有d唔舒服要早走，返到屋企，果醬爸煮左成枱野食，但我完全無胃口食野，淨係想嘔。呢個時候，果醬爸仲笑笑口問：「你係咪有左？」我仲答佢：「我都想有。」（大翻白眼）跟住我諗諗下唔係好對路，就拎左枝驗孕棒搏一搏，點知出現兩條線，我當堂喊左出黎，個一刻興奮得黎有點緊張，緊張得黎又有點不知所措，總之五味雜陳，難以形容。咁中左獎之後要點做呢？ 1. 睇醫生驗孕 呢一步只需要去一間普通診所做就得，通常都係驗小便，之後醫生會問你最後一次經期（好彩有用APP, 所以好準）,跟住幫你計預產期，最後最緊要既就梗係拎張醫生紙啦！ 2. 健康院做登記 有左醫生紙就可以去就近既健康院做登記，由懷孕到往後bb做檢查、打針都會係健康院做，而健康院亦會按情況安排媽媽做檢查，而呢d日子都係可以有醫生紙返公司請假用。 3. 搵私家醫生 雖然公立醫院有得檢查，但其實佢只會安排一次照超聲波（唐氏篩查），之後都只係聽下bb心跳同畀姑娘摸肚，我個人就唔多敢靠晒健康院（因為真心有點hea), 而私家醫生檢查就會詳細好多，每次照超聲波可以更清楚bb既狀況，照結構亦都可以睇下bb既健康情況，當然收費亦都唔便，但絕對值得（因為身邊有朋友出了事所以更加覺得呢d錢唔可以省）。 4. 順產定開刀 生過既媽媽就知，順產都未必係想順就順（有朋友陣痛到最後都係要開刀）,但如果你本來就諗下左開刀，咁就把心一橫，唔好諗住順產唔得要開刀，因為咁分分鐘要經歷雙重痛楚！當然如果係一心想順產既就記得行多d，坐多d瑜珈球啦！果醬媽我就係把心一橫要順產既，但陣痛真係唔係人咁品，不過生完無幾耐就唔記得嚕，仲心思思想黎多個，哈哈哈。 5. 通知公司人事部 當然，有返工既媽媽就記得通知公司啦！