小朋友的世界就只有爸爸媽媽，所以好多時候，孩子都想得到父母親的陪伴，可惜在香港很多父母都需要返工養家，連休息都是奢侈，更遑論放假陪小孩。   最近在Facebook專頁「診所低能奇觀」就有一則個感人故事廣為流傳，這個故事引起不少父母的反思，到底平時是否有足夠的時間陪小朋友呢？   這是講述有小朋友看醫生時希望病假紙上寫上爸爸媽媽的名字，希望公司可以讓父母放假，三人一起出去玩。   ----------------------------------------------------------------------------------------------------   有日一位媽媽帶住一個小朋友嚟到診所。 媽媽個樣非常非常非常攰：「姑娘，小朋友睇呀，睇過嘅，係咪好快有得睇？」 我：「等四個，你有冇佢張覆診卡？」 佢：「冇呀，唔知擺咗喺邊啦」 我：「咁麻煩你講個登記電話號碼我知啊」 佢：「XXXX-XXXX」 我：「搵到㗎啦，轉頭俾返張覆診卡你啊」 佢：「嗯」 佢拖住小朋友行去坐低，喺等候期間，媽媽一直閉目養神，小朋友就眼仔碌碌周圍望，有時仲會偷望吓媽媽。 我：「太太，可以入去見醫生啦」 咦？真係瞓著咗喎。嗌都冇反應～我望望小朋友，小朋友望望我，再望望媽媽，拉拉佢嘅衣角。 小朋友邊拉邊細聲嗌：「媽咪，入得去啦」 媽媽睡眼惺忪企起身：「嗯」   睇完醫生後，佢哋出嚟等藥。 媽媽繼續邊閉目養神邊等呀等～ 又係我嗌醒佢：「可以攞藥啦」 再一次唔醒…今次小朋友冇再扯媽媽件衫～冇再嗌佢起身。 佢喺媽媽手袋拎出銀包，自己一個行埋嚟同我講：「我可唔可以自己攞？」 我：「你知道啲藥點食就得㗎啦」 佢大力點頭。 我：「全部藥每日四次，每次食一匙滿嘅，呢枝係退燒止痛，你有需要先食就得㗎啦，仲有今日聽日兩日病假紙我放埋喺袋入面。」 佢望住我停頓了。 我：「做咩呀？有啲咩問題？」 佢：「張紙...」 我喺袋入面拎返張病假紙出嚟：「呢張？做咩呀？」 佢：「係咪寫我名㗎？我就可以唔返學？」 我：「梗係啦～你睇吓有冇寫錯你名？」 佢：「寫媽咪爹哋名得唔得㗎？」 我：「唔得㗎～係你睇嘅就要寫你名㗎啦。你媽咪爹哋唔舒服嘅就要嚟睇醫生先可以寫佢哋名～」 佢：「我好耐冇見過媽咪爹哋一齊唔駛返工...」 佢：「爹哋應承咗同我去玩...」 媽媽起身了，佢行埋嚟：「我聽唔到你嗌我嘅，唔好意思呀」 我：「小朋友佢自己嚟咗攞藥啦，佢好叻呀，太太你睇嚟好唔夠休息咁喎？」 佢唔好意思：「返工忙呀嘛」 我：「你又返工又湊佢咁勁嘅～」 佢：「唔係呀，學校突然打嚟嗌我接佢去睇醫生，我攞鐘走出嚟咋，轉頭湊佢去奶奶度㗎啦」 我正想開口，佢打斷我：「姑娘，都係三百呀可？得㗎啦可？我哋趕時間去嫲嫲度呀，同姑娘講拜拜啦」 小朋友繼續手拎住張病假紙，一直望住離開診所。   ----------------------------------------------------------------------------------------------------   原文：   ----------------------------------------------------------------------------------------------------