呢張相係Timtam仔6個月大，我地一家人外出食buffet時影，由於我仍未修到身，要著件見得人嘅衫，唯有著返大肚時最靚個條孕婦裙，OMG! 其實個肚大到同我有左六個月時係一樣架！ 終於，我的起心肝要進行我的產後瘦身計劃！   講下背景先！我係易肥底，有左Timtam仔成個孕期重左40磅！生左Timtam仔後5日冇左15磅，之後一個月大約又瘦左5磅，跟住就停頓左冇再瘦過！ 好啦！講返正題先，3星期瘦10磅真係冇呃你架！我自己都好開心！最開心係前幾日爸bi同我講：「咦！媽mi條腰終於返黎喇！」 其實我個減肥方法好簡單，而且好健康，大約歸納左4個要點，大家有興趣可以參考下： 1. 餐前食生果 係每餐之前，都要食一個蘋果/橙，再加一杯水，主要係等有野落左肚，之後先食正餐，增加飽肚感，慢慢收細胃口，唔經唔覺好快飽就會食少左！正餐食咩都得，我自己就食返平常食的食物，薯片雪糕都有食架！不過唔好食太多！ 2. 適量運動 另外我都有做Gym，一星期約3次，每次我做夠消耗左200卡路里我就會停，大約係半小時左右啦！我好懶做夠就停，下次先再做！ 3. 記錄體重  我用電子磅，每朝早未食野就先上磅，如果前一日食多左，第二日上磅就會重左，咁當日就要做返運動追返喇！記錄每日自己的體重，睇住自己磅數不斷輕真係好開心架！ 4. 晚上10時後唔食野 呢個好緊要呀！幾肚餓我都唔食架！太晚食野對個胃負擔好大，好唔健康架！ 我的減肥計劃仍在進行中，到我真係瘦哂再黎同大家報告！未修身的媽媽們，大家一齊加油！   更多有趣分享，可到我的Facebook page: Timtam仔的成長日誌