啱啱睇到有媽媽分享係廣華生BB嘅經驗，我都忍唔住要分享下……諗返轉頭已經年半前嘅事嚕! 我一共入過3次醫院先正式生到，第一次係31週，嗰日我如常返工，點知去洗手間發現底底有一大撻血，所以打個電話俾屋企人就自己搭的士去醫院，我一去到就被安排去到產房駁機check BB心跳同宮縮，之後有醫生檢查過就話我宮頸短，有早產嘅可能，當時我都未知驚…突然有幾個護士同醫生過黎係咁問我痛唔痛，當時我仲一頭問號唔知咩事，原來我宮縮好頻密同好有規律， 佢哋怕我早產，所以叫咗我先生過嚟兼解釋咗一輪畀佢知係咩情況，醫生話要我打強肺針同吊藥拖延時間，就算真係早產都等藥力到BB度，BB唔好咁快出黎，佢地又call咗NICU留定位，如果BB真係出黎就要即刻過去，當時我先知大件事，吊藥吊咗24小時，無得食嘢，好彩無驚無險過咗3日，哩3日見住各位生得嘅媽媽一個一個咁由未痛到痛苦到喊再去生，好似自己預演咗1次咁，而且亦令我知道廣華係自然分娩到就算你痛死要求打止痛針佢都唔會即時幫你，佢地會解釋一輪俾各位知有咩利弊，再叫你三思，同埋生BB嗰邊亦都唔係個個位有笑氣架，所以我都有定心理準備!  跟住落黎醫生要我多瞓床少行路，所以一路開假俾我直至生，我就除咗產檢同返醫院聽講座就邊度都唔敢去……到35週去醫院聽講座，我又再一次見紅，即刻拿拿聲去急症室登記又再被安排去產房，好彩嘅係今次無宮縮，所以好快就放返我返屋企喇 第3次係39週終於正式去生喇! 朝早6點突然扎醒覺得有水，即刻去洗手間一湧而出，所以拎埋個走佬袋就入院喇，由於之前去過2次產房已經熟悉環境，所以我唔太緊張，由6點穿水，到夜晚8點先正式痛到落唔到床，嗰陣先開得2度! 到11點左右已經痛到腰快斷了，真係前又痛後到痛，最辛苦係腰痛，之後有姑娘幫我用按摩油按摩，信我，我覺得按緊嗰陣真係舒緩咗好多！而姑娘都好好，可以俾我老公陪我，教咗佢點幫我按，我老公就一直係度陪住我，有老公陪真係差好遠，直到2點半左右，我急到頂唔住，真心係要便便嘅感覺，結果一check我終於可以去生喇!（我等到喇!!!）去到產房嗰邊，我好記得姑娘叫我睇鐘，佢話3點前生佢出黎，我仲心諗，唔係掛?!仲要捱多20分鐘!?結果我用力push 咗2次，用咗7分鐘，仔仔就出黎喇! 之後問返老公，佢話好 刺激，佢見到bb啲頭髮就唔敢再望（嘻嘻其實我老公好怕血），其實有老公陪產真係好重要! 即使我老公咁驚，佢都肯陪我，所以我好感動架！ 宜家望住搗蛋緊嘅仔仔諗返轉頭，雖然當時好難捱，但一切都係值得嘅! 下一次就可以分享一下乳腺炎入院嘅情況喇！