單身時會諗拍唔拍拖; 拍拖時會諗結唔結婚; 準備結婚時諗擺唔擺酒; 結左婚之後會諗生唔生; 生左之後就會諗…生唔生多個?   處理生唔生多個呢個問題, 同參唔參選特首一樣, 需要一D 感召先做到決定。生一個定生多個, 好處壞處都有數唔到咁多, 但當你想做一件事時, 無論有幾多反對理由, 正確嘅理由只需要一個, 你就可以堅持落去。   BoxingDad同老婆早已有共識, 如果生小朋友就生兩個, 理由不外乎都係個D, 想小朋友多個人陪呀, 學下同人相處呀咁, 但仲有一個長遠考慮, 就係他日我同老婆都百年歸老後, 佢地兩個就係最親嘅人, 就算有各自家庭, 佢地都係兩個最親嘅家庭。 當然有人可能會話:「有D 兄弟姊妹狗咬狗骨, 好似仇人咁架喎。」無錯, 係有呢D 例子, 仲唔係少數, 但都係個句, 一個理由就足夠決定做。   「兄弟是天生的朋友, 朋友是後天的兄弟」, 一句我印象深刻嘅電視劇對白, 令我得到一個清晰答案。   當決定左生多個之後, 下一個問題就係兩個小朋友相隔幾多歲好呢? 如果以四年為分界線, 四年以上算多, 以下算少嘅話, 我個人傾向相隔少D, 因為照顧初生BB 要付出嘅心力太多, 所以想係自己年輕D 嘅時候做, 而家Boxing仔就快一歲, 希望我會好快有喜訊同大家公布啦。