今次去左鹿兒島4日3夜 住左兩間酒店 一間係溫泉酒店，重點推薦。 鹿兒島縣有好多溫泉，而其中霧島溫泉的知名度係日本國亦相當高， 而因為行程日數短既關係就選擇近鹿兒島機場既霧島溫泉， 呢次係我地第一次係日本住既溫泉酒店，而又因為大住個肚  我唔係好浸得 所以我地搵左間平平地既酒店，就係：   鹿兒島霧島溫泉鄉中的 旅行人山莊　   旅行人山莊位於霧島山區高處，所以私隱度極高。 我地渣車去就方便啲，不過唔揸車既酒店好似有提供專車接送， 因為沿路有撞過專車，詳情要向酒店查詢。   旅館設計比較古色古香，大廳多以木為主題， 全間酒店總共五層 二樓為酒店大堂同餐廳，亦有少量客房。 三樓或以上均為唔同型式既客房，分別係和式房，洋式房， 同埋和洋式客房。我地就住左和式客房，始終係溫泉酒店嘛， 瞓下‘他他咪’同埋日式床舖先完全體會到溫泉酒店既。   呢度有３個唔同主題的貸切森林露天風呂同１個室內貸切風呂， 貸切既意住客可以係限定時間入面獨自享用或者 同親友一齊享用呢個溫泉而無其他人可以打擾， 而酒店就會根據入住日數而提供多對享用私人風呂既次數。 換言之，我地只係住一晚就只可以係４個私人風呂入面揀其中一個去浸， 時間係４５分鐘，要預先同酒店預約， 如果唔係好難可以係自己最想浸既時段享用到私人風呂。   而三個森林主題既私人風呂分別為赤松の湯，ひのきの湯，もみじの湯 而室內既私人風呂名為バリアフリー鹿の湯。 其中赤松の湯係酒店既皇牌，相當受歡迎，因為網上睇圖已經靚到不得了， 加上旅行時正值紅葉盛放時期，更加錦上添‘葉’。但可惜既係， 早兩個月預約都預約唔到靚時間去享用呢個赤松の湯， 唯有改浸另外一個ひのきの湯，但都已經好舒服喇       因為酒店周圍俾個大大大既森林包圍，完完全全係置身於山林之中， 所以完全唔受外界打擾。係私人風呂赤裸裸咁浸溫泉都唔怕尷尬， 完全可以享受到片刻寧靜。旅館照顧周到，係溫泉旁會連住間小木屋， 住客可以係木屋先寛衣解帶。 因為陀住細細既關係無得全身落水，但一邊浸腳一邊享受寧靜， 真係乜疲勞都無晒。（下次有機會一定要ｂｏｏｋ赤松の湯嘆番夠本）   簡單介紹番赤松の湯同鹿の湯係屬於単純硫黄温泉，由硫黃谷溫泉湧出，無色無 味帶輕微硫化水素臭；而ひのきの湯同もみじの湯屬於単純温泉， 由丸尾溫泉湧出，無色透明 無味無臭。大家有機會都可以去選擇相應既溫泉嘆下。   當然若果只係浸個４５分鐘溫泉，點夠皮呀？唔怕， 酒店同時會提供兩個大浴場比各住客自由去享用分別為大隅の湯同錦江の湯， 係男女分開既，每到唔同時段，酒店就係比另一個性別既住客享用另一個大浴場， 務求大家可以試晒兩邊既大浴場。大隅の湯同錦江の湯露天既泉水係硫黄泉， 而室內既大浴場係単純泉，所以都可以滿足晒大家。   另外酒店亦到有個龍石の湯係專為浸腳而設既， 無得全身落水既我當然有去浸番夠本啦。一邊望住日落， 一邊浸住屬於硫黃泉既龍石の湯，真係有一刻忘記左小羊羊仲係屋企等緊我番去。   重點介紹完溫泉，酒店既一泊二食亦唔錯，晚餐好精緻， 印埋專有菜單比你留念，嘆完溫泉再食埋個精緻晚餐真係大滿足。   若果大家有機會入住呢個酒店，除左浸溫泉之外， 佢會有條行山路徑比大家散下步，終點係花房の淹， 其實係個瀑布仔黎，沿路佈滿紅葉， 朝早行下呼吸下新鮮空氣都幾舒服下。   旅行人山莊 地址：〒899-6603鹿兒島縣霧島市牧園町高千穗3865 網址：http://www.ryokojin.com   大家有興趣真係去睇下。真心分享。 >【看更多媽咪分享 #BABYMOON 旅遊經歷】<