轉眼間小JM已經接近八個月大了，加固情況亦很理想， 可能係因為小JM本身都係一隻"為食豬"，所以都好願意去嘗試唔同既食物。 係小JM 六個月大既時候媽咪我就開始為小JM打好加固既基礎， 慢慢由米糊開始，漸漸地變成而家可以食粥仔， 甚至可以令小JM以粥仔代替到一餐既媽媽奶。 上回提到究竟幾時應該開始加固；點樣加固 同 有啲咩要注意既地方， 今次就不如講下點樣為BB準備第二階段既加固啦～＾＾～ 回顧： C。J の 爸媽手記。為食小JM。加固知多少。起步篇 因為小JM比較為食， 所以係小JM未夠七個月既時候就已經開始轉食稀粥， 為左想令小JM食得更滿足，所以媽咪買左個 多功能燉煲 來整粥仔俾小JM食。 至於點解買呢個燉煲，其實都有幾個原因既： 1.）除左係燉盅之外，仲有煮BB粥既功能，又可以蒸煮，亦可以保溫，真係一物幾用 2.）價錢合理 3.）深得各大媽媽們推介 所以媽媽我又點可以唔買返個來用呢 當BB踏入七個月既時候， 就意味著BB已經可以進入第二階段既加固期， 呢個時候媽媽們就可以為小B預備各種不同種類、不同質感同味道既食物作嘗試。 但媽媽們都需要緊記，每個小B既加固進度都會有所不同， 所以切忌太過於急進，以免嚇怕左小B就唔好啦！ 雖然小JM已經進入第二階段既加固期，但媽媽奶仍然係小JM最愛既主要食糧。 而家小JM既每日進食進度如下： （進度只供參考） 08：00 媽媽牌 12：00 粥仔 15：30 媽媽牌 ＋ 餅餅 19：00 粥仔 （一碗半） 22：30 媽媽牌 因為小JM已經開始左加固，所以媽媽都日俾返少少水 ／ 果汁溝水 俾小JM飲， 以促進腸道運作，Keep住有Bubu。 雖然而家在職媽媽一般都比較忙，甚至要早出晚歸， 但為左小B既健康成長，相信好多媽媽們都會不惜勞苦咁為小B準備美味既食物既， 至於點解推薦自家製，其實都不外乎以下幾點： －自家製比教經濟實惠一啲，而且食物會較為新鮮，對小B而言更為健康 －自家製食物可以隨小B口味而改變食物既味道同口感，以更符合小B既口味，增加小B食慾 －自家製可以有助媽媽們了解小B既口味 為小B們煮食有幾大陣象？ 其實為小B們準備食物分分鐘可以話"大陣象"過煮一餐飯， 因為要準備既用具都唔少架 除左平時一般既煮食用具之外，不如又睇下有啲咩會用到： 1.）食物處理器／攪拌機 2.）蒸煮鍋 3.）燉盅 4.）有蓋既冰模 5.）密實袋／保鮮袋 6.）食物剪（小B專用剪是也） 當然仲有啲碗碗碟碟之類啦，都係小B們專屬用具之一。 預備好晒要用既器具之後， 媽媽們就可以準備為小B準備食物， 其實除左粥仔以外， "Finger Food"都係一個唔錯既選擇來架。 何謂 "Finger Food"？ Finger Food 即係 手指食物 當小B進入第二階段加固期就已經可過透過Finger Food 來訓練小B慢慢自己進食， 雖然距離正式可以自己進食仍有一段距離， 但媽媽們可以透過 Finger Food 來鍛練小B學習用手指拎起食物放入口進食， Finger Food不單可以幫助鍛鍊小B手指既靈活度， 更可以透過Finger Food提高小B對進食既樂趣， 仲可以俾小B嘗試觸摸不同質感既食物，增加觸感。 溫馨提示： 記得為小B穿著上易於清洗既衣物，或者鋪好晒地墊先試， 唔係就會整污糟晒啲衫同地方架啦。 坊間亦有一啲可重用／即棄既餐墊、圍巾同食物圍兜可以幫小B們避免整污糟衫同地方架。 點樣整Finger Food呢？ 先將新鮮買返來的蔬果或肉類切底洗淨， 切成粗條狀，以方便小B們拎起來自行進食 切好之後就可以放入滾水中烚，肉類需要完全熟透， 蔬果則烚至稍微軟身就得架啦 ＊暫時小JM最愛既有呢幾類既Finger Food： －蘋果、梨、桃、青瓜、菜芯 咁，媽媽們又有咩要注意呢係小B進食或食Finger Food既時候？ 媽媽們既責任就重大啦， 當然係離不開以下幾項啦： 1.）係俾小B進食前，媽媽們要細心檢查一下食物既溫度 2.）再檢查食物既軟硬度係咪適中 3.）親身試吃，示範俾小B睇 4.）陪小B進食，同觀察小B既進食情況 溫馨提示： 當小B試食Finger Food既時候， 媽媽們都要多加留意小B，以防小B哽親， 因為有啲食物會較易咬斷，以致小B誤吞而造成危險架。 除左Finger Food之外， 媽媽們亦可以花多啲心思係小B既粥仔度， 有助提高小B進食既興趣， 例如可以係粥仔度加入菜蓉、蛋黃、魚或肉蓉等。 如果媽媽無太多時間去整蓉既話， 可以用攪拌機幫手，又或者係坊間買現成既都可以架。 同場加映小JM食 Finger Food既為食照～ >>> 看更多BB飲食文章 <<< >>> BB加固食咩好？睇下媽咪推介的BB食譜 <<< 歡迎有興趣人仕聯絡 我 同 小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯 與 晴 （Jolie Babe。小JM の 成長印記）
