今個聖誕諗住點過，又係同商場聖誕老人影相？又係睇假雪場景？不如嚟挪亞方舟過番個綠色聖誕 我哋一早10:00就坐旺角新世紀廣場專線車入到挪亞方舟，哥哥妹妹俾飛入場神情嚴肅，佢哋梗係以為係過海關，驚自己入唔到閘，哈哈哈！ 一入到嚟哥哥就發現有好多動物，好想即刻搵哂佢哋出嚟(但係其實佢已經唔係第一次嚟) 每個小朋友都會獲發一份保衛地球大作戰「任務手冊」，內附6張價錢＄10遊戲券，另外每做一項任務就可以蓋印！我哋今日一定要完成任務先準走 我哋先到餐廳外面的幾個遊戲攤位，全部攤位遊戲任何入場朋友都可以參加，只需要遊戲券 2 張就可以玩一次 我哋先玩第1個遊戲「極地探險家」 (遊戲券 2 張)，玩法就好似Angry Bird咁，將北極熊彈去碟上面就算贏 雖然有6次機會，但係其實真係唔容易...排喺我哋前面幾個小朋友都彈唔中，不過我都好欣賞家長們又好放手俾小朋友玩，唔會因為想贏就插哂手！ 最估唔到係居然輪到哥哥玩，佢第2次就....中咗啦！！！！！！妹妹就失手，不過佢都好乖冇失望扭計 之後我哋過去另一邊玩「海龜拯救隊」 (遊戲券 2 張)，玩法係有4次掟蛋嘅機會，其中3隻海龜蛋碌落去藍色格格先算贏，今次到哥哥失手，反而芊芊贏咗，中咗隻海龜公仔呀，好嘢... (P.S. 攤位哥哥仲好攪笑，攪到小朋友都好輕鬆好開心咁玩) 一嚟就有個好開始！兩個小朋友開心到不得了，呢兩個遊戲真係唔易玩，好講彩數！好在一人一隻唔駛爭 唔好俾佢停，跟住我哋就即刻玩「飛天救兵」 (遊戲券 2 張)，簡單嚟講即係射擊Game，有四發子彈要射跌3塊板先可以嬴到公仔 雖然哥哥射唔中，但係到芊芊玩嗰陣有我幫手，又贏到一隻蟲蟲公仔啦！Heee...(呢個唔難玩大家可以試吓) 手上嘅遊戲券用哂，就再補錢買多幾張遊戲券，打算玩齊6個攤位遊戲就停手吧 跟住玩嘅係「森林守護者」 (遊戲券 2 張)，只要將個呼啦圈掉中棵樹，但一定要穿過埋方形底座先算贏！今次又係哥哥中咗呀...嘩，今日哥哥好利害呀，周圍小朋友「嘩嘩聲！」攪到哥哥好怕醜 定格重溫！1。。。2。。。3 妹妹掉哂落地下，哈哈！ 「海洋保衛特工」 (遊戲券 2 張) 要1分鐘內釣起同顏色大魚，釣到3隻有細獎，4隻有大獎...媽咪同哥哥合力成功釣起3隻大魚，贏咗隻海豚公仔呀！好開心呀 呢個由Goldfish 呈獻：「地球彩虹戰隊」 (遊戲券 2 張) 就係傳統掉彩虹，掉中咗就可以得到Goldfish獎品！ 其實仲有幻彩泡泡 show (免費) 同埋方舟動物騎騎樂(遊戲券 3 張) *只限 11 歲或 以下小童參加，身高 110 cm或以下之小童，須由家長陪同，大家如果之後日子嚟玩記住唔好錯過呀 滿載而歸好開心呀，我哋不嬲都好少這種運氣，今日居然贏咗咁多隻公仔(其實唔係太難玩，$20可以贏一隻公仔，好過外面用好多錢去夾公仔啦) 玩咗咁耐要去開餐啦，我哋去豐盛閣食番個Set Lunch醫醫肚！ 兩個兒童梗係食番個兒童餐啦！成架穿梭機送上嚟！ 食飽飽我哋開始要去完成任務啦！全部任務都係免費同埋只限11歲或以下小童參加，我哋首先去到2樓參加第一個工作坊，就係廢物利用，用屋企廁紙筒去做個聖誕筆筒(只限12月18、25、27、31及1月1日) 屋企成日都有好多廁紙筒，每隔2日又多一個廁紙筒，我哋都曾經做過好多唔同嘅嘢同遊戲，今日又學多樣新嘢啦 開開心心整完筆筒之後我哋就嚟到方舟博覽館 之後嚟到未來方舟影院睇一段4D動感電影，俾小朋友認識今日地球嘅環境，提高佢哋嘅環保意識，不過兩個剩係識得玩，準備開始啦...大家記住場內係嚴禁拍攝㗎 出番嚟我哋先離開方舟，去到另一邊嘅大陽館完成任務，套票係包括到太陽館，只要出閘時打手印，一陣就可以番入去方舟 大家要留意番太陽館係早少少收工㗎！所以要襯早過去玩 行一段山路大約10分鐘就可以去到太陽館 一入到嚟小朋友就俾呢個好似金魚缸嘅嘢吸引咗過去，其實佢好簡單咁介紹咗成個生態系統 見到呢個八大行星模型我好想買呀，用嚟第日交功課haha... 我哋嚟到第2個工作坊啦，今次我哋要自製一個聖誕鐘！啱哂...咁啱屋企個鐘壞咗，仲要係佢哋親手造嘅，呀芊一定會學識睇鐘 兩個都好有心機咁偷睇隔離...哈哈！ 然後畫上自己鍾意嘅圖案同埋貼上唔同嘅裝飾物 大功告成！ 每完成一項綠色任務，我哋就可以蓋一個印仔 完成任務後，我哋又番去方舟抖一抖！ 嚟到Noah's Kitchen坐低抖一抖，飲杯茶食個飽，再去完成其他任務 叫咗兩杯暖笠笠「聖誕雪人鴛鴦特飲」暖暖個身先，兩隻雪人瞓喺杯朱古力上面超得意，仲同埋D戰利品一齊影相 呢度都有下午茶同小食提供㗎！價錢都唔算貴 「聖誕雪人鴛鴦特飲」$24 大家要留意佢供應日期：2016年12月10日至2017年1月2日 (中午12時至下午5時) 跟住我哋又上咗去1樓製作呢個膠樽雪人錢罌，用一個空樽，放少少水同顏色落去搖勻，成個樽身就即刻變咗白色好靚 芊芊搖樽搖到好肉緊！搖到雙下巴都走咗出嚟，番嚟睇番張相真係笑死我 跟住就可以幫個樽畫上眼耳口鼻！ 你哋睇吓幾得意！幫佢哋造埋條頸巾，再用紙杯設計埋頂帽就大功告成！ 又可以蓋多個印啦，玩吓玩吓都差唔多要去完成埋最後一個任務啦 就係整DIY迷你暖暖包啦(12月17日除外)！呢個用米造嘅暖包，用唔要嘅布塊同埋少量白米就可以 將白米倒入預備好嘅布袋，然後放入去微波爐度叮一叮 個暖包可以維持5-8分鐘暖笠笠，跟住要再翻叮先得，今日真係好多收獲 今個聖誕節嚟到挪亞方舟過呢個綠色聖誕真係覺得好有意義，我哋完成哂所有任務，成為挪亞五星拯救戰隊隊長啦！ 最後唔少得梗係要喺景點影番張相留念啦，可以同兩年前影過嗰張對比吓兩個小朋友的成長！ 凡於挪亞方舟正門票務處/挪亞方舟網上訂票平台或於旺角新世紀廣 場1樓商場顧客服務中心購買或換領入場票，均獲派「任務手冊」以 茲識別，隨每本「任務手冊」贈送6張價值港幣10元之遊戲券可參 加活動；更多入場細則，可瀏覽新聞稿內的特別備註 Photo by CANON 5D Mark IV, Len | EF 24-70mm f2.8L II USM 想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2 呀劍評分: 10分 呀劍評語: 12月先啱啱開始，雖然未到聖誕，但係嚟到挪亞方舟已經充滿聖誕氣氛，好開心可以嚟到過咗一個綠色聖誕！又溫暖又有意義，實在係一個聖誕超好的親子活動 香港挪亞方舟聖誕奇趣嘉年華 - 保衛地球大作戰 簡介 挪亞方舟聖誕奇趣嘉年華即將開鑼，一場「保衛地球大作戰」馬上展開，號召各位小朋友登上方舟，化身地球戰士，為地球保育出一分力。地球戰士將獲委派六大環保主題挑戰任務，透過各類緊張刺激的攤位遊戲、體驗活動及工作坊，提升小朋友的環保意識，一家大細玩轉別具意義的嘉年華，歡度綠色聖誕，將精美獎品帶回家。 地點 香港新界馬灣珀欣路33號 日期 2016年12月10日至2017年1月2日（星期六、日及公眾假期） 時間 上午10:00 至 下午6:00(挪亞方舟度假酒店24小時運作) (豐盛閣餐廳開放時間:上午10:00至下午9:30) (大自然公園開放時間:上午8:00至下午6:00) 以下是部份展館的最後入場時間: 太陽館 下午 5:00 大自然公園 下午 5:00 方舟博覽館 下午 5:15 方舟生命教育館 下午 5:45 珍愛地球館 下午 5:45 方舟花園 下午 5:45 套票詳情 http://www.noahsark.com.hk/tra/ticket.jsp 聯絡電話 3411 8888 電郵 info@noahsark.com.hk (以上資料更新至文章當日) >>> 聖誕去邊玩? 一齊睇下媽咪介紹更多聖誕好去處啦! <<< >>> 睇下MAMIBUY 2016聖誕特輯 - 聖誕有咩玩有咩食! <<< Facebook專頁: 呀劍萬帥 kimfamilytravel Blog網誌 : kimfamilytravel.blogspot.hk
