幼稚園開學無耐, 話咁快就又去秋季親子旅行了, 莎拉同謝菲都對呢次活動好重視, 所以就齊齊請假去喔. 今次既學校親子旅行係全校參與, 所以K1, K2及K3加加埋埋都有9架旅遊巴, 聽聞有啲家長仲報唔到名要Waiting list呀, 真係誇張呢. 一返到學校, 陶寶B就周圍去搵同學仔玩, 今年比起上年, 明顯地陶寶B又大個仔咗啦, 非常識Social, 排隊上巴士坐定定就向大西北方進發啦. 今日第一個行程就係天水圍既綠田園, 查實如果唔係跟學校嚟, 平時自己就一定唔會嚟. 園內有一啲小型機動遊戲, 不過全部都要自費, 所以最後就選擇了一個未玩過又好似好得意既”手動小船”, 多謝$30/10分鐘. 呢隻小船係要自己手動攪的, 所以如果左右手唔協調, 船仔就會不斷地自轉, 好彩陶寶B玩咗一陣終於知道點玩, 查實睇落都幾好玩架.  玩完呢個小玩意後, 陶寶B就拖住佢個好朋友一齊去湖邊餵魚呀.  呢個小小竹林, 小朋友不斷地係入面穿梭, 大人看在眼中既無聊玩意, 小朋友就自得其樂.  係綠田園逗留咗大約1小時後(好彩1小時咋, 耐啲都唔知有咩玩) 就出發去食嘉湖海逸酒店食buffet, 大家聽到buffet一定以為好正, sorry, 絕對唔係平時食既buffet, 不過食既地方就又企理乾淨都算唔錯, 起碼大家都食到飽飽的. 因為有成40圍, 所以第一輪都要叫檯號先可以出去攞食物.  小朋友食飽飽就當然坐唔定, 佢地就開始周圍玩, 攬頭攬頸不知幾friend呀!  之後就成班豬仔排隊出外面等巴士出發去濕地公園了.  今次係莎拉第二次嚟濕地公園, 上次嚟既時候已經係未結婚的那些年了. 陶寶B再度發揮熱情性格, 拖住同學仔一齊行.  莎拉問陶寶B平時會唔會咁拖住一齊行, 原來係唔會架, 所以今天會特別開心及熱情.  多年無見既貝貝鱷魚如今已經好大條啦.  或者小朋友都仲係細, 所以對好多濕地公園既動物都好陌生, 加上好多雀仔都係遠距離, 所以唯一令到一班小朋友比較興奮既就係彈塗魚了. 原來平日都有好多學校團體嚟濕地公園, 所以一下只好熱鬧, 一啲都唔似濕地公園.  最大驚喜就係見到差不多絕跡既怕羞草, 其實莎拉都係第一次見, 所以莎拉同陶寶B玩得不知幾咁開心呀.  話咁快今日就玩足一整天, 大人同小朋友都已經放晒電, 開車唔夠10分鐘大家就已經瞓著咗啦. 幼稚園既時光真係好開心, 期待下一次既親子活動喔. >>> 看更多親子活動文章分享 <<