上回講到我哋會再戰Oyster Station，並且會向佢哋嘅頂級生蠔埋手，機會來喇！一齊嚟睇下價格高啲嘅生蠔，係咪真係滋味好多啦！ 上次去過大角咀分店，今次見尖沙咀店新開張，梗係貢去試試啦！ 大大個display櫃除咗放咗啲小擺設外，仲展示咗各方好友對新店嘅祝賀~ 當中仲包括咗一啲名人嘅簽名添！ 全部都係寫在白色碟子上，好有特色~ 餐廳都幾寬敞舒適，有梳化位亦有高枱位。枱與枱之間有足夠空間感，環境唔錯喎！ 去生蠔吧睇睇先~ 今晚總共有8款生蠔選擇，有兩款上次試過，就order未試過嘅6款啦！ 嘩！我哋啲蠔呀！每次都有啲菜做裝飾，其實佢係分界線嚟㗎！由菜嘅左邊順時針咁食，就可以品嚐到由淡味至濃味嘅生蠔喇！ Saldanha Bay - 來自南非 $39/隻 umm...好creamy呀！不過的確係較為淡味嘅品種~ Nelia - 來自西非 $48/隻 同樣creamy，而且厚肉，又晉升一級喇！hoho~~ Cumbrae Pearl - 來自蘇格蘭 $39/隻 creamy得嚟帶點清甜，不過較為細隻同埋肉質簿，但係蠔味十足~ Arousa - 來自西班牙 $58/隻 肥嘟嘟，好大隻呀！ 叉起佢嘅時候，份量十足！ 食落真係好厚肉，而且仲有粒大帶子。勁like!!! Ostra Regal - 來自法國 $58/隻 好䶢，勁重海水味，肉質相對簿身，唔係我like果type Gillardeau - 來自法國 $58/隻 同樣極重海水味，偏瘦同細隻，不同之處係佢粒帶子都幾好肉呀！ 話咁快就畀我哋清晒lu，係咪再嚟多round先？XD 好啦好啦！第二round叫咗$10/隻生蠔 唔好畀佢停，繼續食囉！~~ 啲生蠔唔算肥美，但都係有水準同好味嘅，$10/隻算係咁啦！ 炸啤酒薯條 - 新鮮熱辣啱啱炸起，炸得好香脆。不過食唔到有啤酒味，可以放心畀小朋友食。脆卜卜口感好正！ 熱辣辣，小心辣親咀或手指呀！呼~呼~~ 野菌意大利飯 - 失敗之作！個汁同飯完全分離，上次在大角咀店明明好好味格！哼哼！原來同一間店但唔同分店質素都有所偏差~ 有美食點可以冇飲品呀？難得今晚拍拖夜，一於啤啤佢~ 咁特別嘅飲品係咩嘢嚟？Somersby Cocktails分別有Fuzzy Cranberry(無酒精)同Tickled Pink(含酒精)組合都係$68/set咋！抵飲呀！ 飲品仲跟埋1樽Somersby Apple Cider添！甜啤酒+特飲，味道好好呀！ Good good good~~~ 你今日飲咗未呀？XD Fuzzy Cranberry同Tickled Pink其實都係好似fruit Punch味道嘅飲品，但不同之處係Tickled Pink落咗啲whisky，所以感覺會「哽」啲~ 輕輕鬆鬆又撐咗一晚枱腳喇！大滿足！ 平時去食buffet想食生蠔總係要排下隊，而家可以舒舒服服咁等人送過嚟，感覺真係唔錯。全晚侍應都好勤力，服務幾好。生蠔上枱嘅時候，仲會為我哋逐一介紹每款嘅獨特之處添！忙碌中都仲可以主動幫忙影相，呢個值得一讚呀！生蠔方面，我至鍾意係來自西班牙嘅Arousa，而啤酒薯條都值得推介呀！配埋啤酒，簡直為我哋嘅happy hour生色不少。不過提提大家，記得要打去book位喎！因為walk-in未必有位㗎！ 你可能會有興趣睇埋我哋上次去大角咀店嘅情況：http://blog.xuite.net/chinglongtin/blog/454430057 Oyster Station Snack & Oyster Bar大角咀店：大角咀詩歌舞街83號亮賢居地下一號舖 電話：2457 1233尖沙咀店：尖沙咀諾士佛臺1號7樓 電話：3188 5818樂富店：樂富聯合道198號樂富廣場街市地下401-402號舖 電話：2549 0132土瓜灣店：土瓜灣宋皇臺道38號傲雲峰地舖 電話：3514 3062網址：http://www.oysterstation.com.hk