本身預產期10/1。4/1個日去朝早去廁所發現有少粉流啡，驚驚地都係入院檢查。 去到B4產房，做左個基本檢查，都係未生得，就去左產前C2病房，同時間排二等房。 產前病房唔算爆，我訓個邊一共有8張床，係到訓既呢幾晚都聽到唔少人陣痛，有D孕婦會大叫，有D好忍得痛。雖然當時我仲未係好痛，不過聽到都有D驚驚。 係C2第一晚訓得麻麻地，始終訓唔慣，同埋呢晚開始有D M 痛既感覺，不過呢種都未算係陣痛，所以都係繼續要等。到左第2朝，以為穿水，點知原來唔算係，因為要持續咁樣有水流先算，醫生check 完就話我子宮頸都熟，但未開度數，即係都ready ge. 但醫生未講話要催生，唯有再等下。C2 有間房係有得玩fit ball, 但第一次玩要搵姑娘教教點使用。 到6號個日，醫生朝早巡完房，醫生問我催唔催生，本身都想想地，但係心態上又未係好ready, 再加上覺得唔係咁好日，又拖下先。 到7號朝早，心態上都係未ready, 決定拖多一日。最後醫生都批准。 到7號晚，咁岩排到隊上A11病房，即係二等房，yeah 生之前個晚可以上到房，咁第2日落產房唔晒拎咁多野。不過呢晚都訓得好差，真係5分鐘就痛一次，成晚其實好攰，基本上30秒就訓著，但2-3分鐘後痛醒左，如是者成晚就係咁loop. 但係姑娘話呢種產痛都係未到陣痛，所以都係乖乖地等醫生朝早巡房。 朝早醫生巡房，睇兩睇個file，就話安排催生啦。 換件紫袍，去個廁所，種埋粒豆，打過電話比老公叫佢食過早餐慢慢過去產房，我就落B4產房了。 入到3號產房，大概係10點3到，好快手咁上左張床，姑娘同你核對左D資料，就準備吊鹽水，等左一陣，有醫生就入黎穿水，大概10：45到，開始落催生藥水。 11：15到老公就入左黎陪產。可能前一晚訓得好少既關係，係催生前半段時間都好眼訓，由11：15-1：15 既時候個種陣痛同前一晚差不多，去到1：15 聽到醫生話要加重劑量無幾耐開始覺得黎料，真係好痛，但配合深呼吸加用笑氣都算頂到。大概2：00到聽到醫生講開左0.5度，與此同時陣痛愈黎愈勁，老公都不停提我要深呼吸，唔好叫，大概2：30到醫話開左5度啦，聽到之後覺得好鼓舞，於是頂多20分鐘開到10度，生得啦。開到10度其實無乜感覺，但咇個仔個下其實好似痾大屎咁，大概十零分鐘，聽到阿仔既喊聲，出世啦。生左大概4個半鐘其實都算快啦。初頭個姑娘係到講可能要攪成10個鐘個下真係崩潰左。 生仔係咪好痛？一定痛架，但係配合呼吸同肌肉力量其實會舒緩痛楚。 話明陣痛，就係無痛既時候要爭取時間抖抖 好似以前游10X100m on 1:20 咁，游緊個陣就陣痛，返到池邊就可以抖。 我覺得做瑜珈好有幫助，另外懷孕期間多D去散步，生產過程都容易D。