上文分享過，我家妹妹眼睛嘅問題。 [ 上文重溫 ]   我都係第一次嚟到眼科醫院，今次妹妹亦係新症。   所以我哋可以直接去到5號窗辦理手續，辦理手續須出示小朋友出世紙/身份證明文件、最近三個月住址證明(我用我嘅銀行信)、及醫生轉介信正本。 而今次去到眼科醫院跟進，診金為$135。   之後，職員就將「病歷紀錄冊」交俾我，入面夾好妹妹嘅醫生轉介信。 然後上到一樓，去診症室交低，等拎牌版。     拎到牌板之後，就要落返去地下嘅視覺矯正部等候視光師嘅初步檢查。     檢查完，再將病歷紀錄冊交返一樓診症室，之後再會見醫生。 就安排同妹妹滴放大瞳孔藥水，作進一步檢查。     妹妹都好叻女，因為前前後後加埋滴咗4次藥水... 佢都好叻女，雖然後尾有少少反抗，但最後佢都做得到!   不過，姑娘有提到小朋友咁細用呢啲藥水，或會出現下面嘅情況。   所以，叫我一定要留意住妹妹今日嘅情況!!   完成4次藥水，又需再到地下視覺矯正部等候視光師嘅檢查。   今次視光師用一個節單儀器，就幫妹妹度到有冇近視、遠視同散光... 然後，視光師話妹妹散光都幾嚴重，有200度同250度...!!   小朋友有散光，係因為眼球形狀問題，所以呢個係天生...   之後，再來到醫生進一步檢查。 醫生檢查後，佢同我講一次散光問題，而醫生話散光係冇得根治。 只可以控制，所以妹妹都需要開始配戴眼鏡...   另外，妹妹亦診斷為有「間歇性外斜視」。 原來係妹妹眼部肌肉鬆弛，所以我哋由而家開始需要同佢做一啲眼部肌肉訓練遊戲。 醫生仲話...嚴重嘅話係需要做手術去治療!!!   配合妹妹嘅眼部(外斜視)情況，呢組眼部肌肉訓練遊戲其實好簡單。 大概一隻手臂距離開始，拎住小物件吸引小朋友。 要小朋友眼睛望實小物件，然後小物件慢慢移向小朋友眼睛前，令小朋友眼睛呈現「鬥雞」，保持5秒，就可以重新再嚟。   ^ 引導小朋友眼睛望實小物件   ^ 然後小物件慢慢移向小朋友眼睛前，呈現「鬥雞」狀況。   最後，大家如果有留意到小朋友睇嘢亦會瞇起眼、經常捽眼、側頭或者側頸。 小朋友或者有可能係視力上出現小問題，要及早就醫哦!!   ^ 與斜視相關之資訊     ^ 與惰視眼相關之資訊   疫情期間要去醫院，其實我都好擔心... 但係，考慮到妹妹眼睛嘅問題。 我哋都唔想拖，希望儘早就醫。   去到醫院，儘量唔俾小朋友除口罩進食飲水。 同時間，等候時間亦比較長。 所以，建議如果小朋友仲可以用Hip Seat盡量孭住佢。 真係太扭計...喺氹唔到，又無計可施之下就拖住佢行一陣啦...   ^ 一個人帶住妹妹去醫院，扭計扭到瞓著咗嘅妹妹...       【網絡上關於兒童散光嘅文章】 https://www.jktree.com/disease/article/5e67.html https://health.tvbs.com.tw/regimen/306458 https://www.healthway.tips/content/374643373337423936313346.html https://vitomag.com/baby/yezax.html     【和牛B個妹。Login成長日記】幼兒眼睛問題「斜視」| 健康院轉介眼科醫院 【和牛B個妹。Login成長日記】訓練BB獨立自己進食 【和牛B個妹。Login成長日記】疫情下的寶寶。戴口罩訓練 【和牛B個妹。Login成長日記】一至三個月大嬰兒發展 【和牛B個妹。Login成長日記】1歲半健康院檢查 【和牛B個妹。Login成長日記】技能解鎖 – 刷牙 【BB成長日記】二寶與大寶嘅成長分別 | BB大不同 【二寶媽媽】湊B心得。第二胎比第一胎照顧得更輕鬆 【BB成長日記】疫症下的QE新生嬰兒黃膽 | 私家醫院跟進服務公院收費 【二寶孕記】疫症下生BB，政府醫院生BB (QE) 陪產? 探病? ============================ 記得Follow埋我哋Facebook、MeWe同Instagram呀 https://www.facebook.com/80smami https://mewe.com/p/和牛b的成長日記 http://www.instagram.com/wagyubmami/ ============================ 我的網店C.Mozo Store https://cmozostore.mallogram.com/zh-hk/